საპარლამენტო უმრავლესობის წევრის დავით ბერძენიშვილის განცხადებით, 2004 წელს როდესაც “ნაციონალური მოძრაობის” ბლოკი ოთხმა “რესპუბლიკელმა” დატოვა, შემდგომ პროცესებში ისინი მიზიდულობის ცენტრი აღმოჩნდნენ.
როგორც ბერძენიშვილმა აღნიშნა, ის მარჩიელობას ვერ დაიწყებს, თუ რა გახდა რეალურად დეპუტატების მიერ „ნაციონალური მოძრაობის“ დატოვების მიზეზი.
„თუკი ზურაბ ჯაფარიძე და მისი პარტნიორები ამბობენ, რომ „ნაციონალურმა მოძრაობამ”, მათი აზრით განახლების პროცესი ვერ შეძლო და ეს მიაჩნიათ მთავარ მოტივად, ეს მათი დეკლარირებული პოზიციაა. ამიტომ, რაიმე ტიპის მარჩიელობას მე ვერ დავიწყებ. არცერთი პოლიტიკური პარტიისთვის არ არის სასარგებლო, სასურველი, უხიფათო, ოთხი დეპუტატის წასვლა. ოთხი „რესპუბლიკელი“ წავედით 2004 წელს „ნაციონალური მოძრაობის” ერთიანი ბლოკიდან. ეს ოთხი დეპუტატი მიზიდულობის მთავარი ცენტრი აღმოჩნდა შემდგომ პროცესებში. ვნახოთ მოვლენები როგორ განვითარდება. ველოდები პარლამენტს გარეთ რა რეაქციები ექნებათ „ნაციონალურ მოძრაობის” წევრებსა და განსაკუთრებით, მაინტერესებს იმ წრეების დამოკიდებულება, რომლებიც შესაძლოა საკუთარი ხედვებით არ იყვნენ შორს ზურაბ ჯაფარიძისგან”, – განაცხადა დავით ბერძენიშვილმა.
