დღეს თბილისის მერმა დავით ნარმანიამ წუხელ მოსული ძლიერი ნალექით გამოწვეულ პრობლემებთან დაკავშირებით საგანგებო თათბირი გამართა, რომელსაც მერიის შესაბამისი საქალაქო და საქვეუწყებო სამსახურების ხელმძღვანელები და თბილისის გამგებლები ესწრებოდნენ.
როგორც დავით ნარმანიამ განაცხადა, ძლიერი წვიმის შედეგად დედაქალაქის რამდენიმე უბანში პრობლემები შეიქმნა, რომლის ლიკვიდაციაც უმოკლეს ვადებში მოხერხდა.
„ჩვენმა სამსახურებმა მთელი ღამის განმავლობაში ძალიან სწრაფად და ოპერატიულად იმუშავეს. ყველა რაიონის გამგეობა, კეთილმოწყობის საქალაქო სამსახური, „თბილსერვის ჯგუფი“, „სინათლის ქალაქი“, სასწრაფო და სამაშველო სამსახურები, საპატრულო პოლიცია ოპერატიულ რეჟიმში კოორდინირებულად მუშაობდნენ, რისთვისაც თითოეულ მათგანს მადლობა მინდა გადავუხადო. ამ დროისთვის დედაქალაქში, პრაქტიკულად, ყველა პრობლემა დაძლეულია. მიმდინარეობს გაწმენდითი სამუშაოები, რის შემდეგაც დაზიანებული მონაკვეთების აღდგენას დავიწყებთ“, – განაცხადა დავით ნარმანიამ.
ძლიერმა წვიმამ პრობლემები შექმნა დიდ დიღომში, მტკვრის მარჯვენა და მარცხენა სანაპიროს მცირე მონაკვეთებზე, მთაწმინდის რაიონის გარკვეულ უბნებში, მამადავითის ეკლესიისკენ მიმავალ გზაზე, ვარაზისხევსა და მდინარე ვერეს მიმდებარე ქუჩებზე, სადაც მდინარის ადიდების გამო 5 ოჯახი დაზარალდა. ზიანი მიადგა, ასევე, ვაკეში არსებულ ძაღლთა თავშესაფარს. უხვმა ნალექმა რამდენიმე ქუჩაზე გარე განათების ბოძები და ელექტროგადამცემი ხაზებიც დააზიანა, რის გამოც გარე განათებისა და ელექტროენერგიის მიწოდების მხრივ მცირე შეფერხებები შეიქმნა, თუმცა, პრობლემა მალევე გამოსწორდა.
თბილისის მერმა საგანგებო თათბირზე გამგეობებსა და სამსახურებს უმოკლეს ვადაში ზიანის აღწერა დაავალა.
„რაიონულმა გამგეობებმა შეისწავლეთ დაზარალებული მოსახლეობის მდგომარეობა და, თუ რომელიმე პრობლემა გამგეობის დონეზე არ გვარდება, დროულად წარმოუდგინეთ მერიას, რომ მყისიერი რეაგირება მოვახდინოთ. ასევე, ვავალებ ზედამხედველობის სამსახურს, რაიონების გამგებობებთან ერთად, შეისწავლოს ყველა საკითხი. კეთილმოწყობის სამსახურმა, „თბილსერვის ჯგუფთან“ ერთად, დროულად უნდა გაწმინდოს სანიაღვრე ქსელები და დაზიანებული გზების მონაკვეთები“, – განაცხადა თბილისის მერმა.
ამ ეტაპზე დედაქალაქში რამდენიმე ქუჩის გაწმენდითი სამუშაოები აქტიურად მიმდინარეობს და ქალაქში გადაადგილების მხრივ შეფერხებები არ არსებობს.