დღეიდან თბილისში კიდევ ერთი სასტუმრო დაიწყებს ფუნქციონირებას.
თბილისში წულუკიძის ქუჩა N-9 სასტუმროს ”Iveria Inn’’გახსნის ცერემონიალი გაიმართა, რომელსაც დედაქალაქის მუნიციპალიტეტის საკრებულოს თავმჯდომარე გიორგი ალიბეგაშვილი, თბილისის მერი დავით ნარმანია, საკრებულო თავმჯდომარის მოადგილეები გიორგი ტყემალაძე და გიორგი ახვლედიანი, ასევე სხვა ოფიციალური პირები დასწრნენ.
გიორგი ალიბეგაშვილმა კომერციული ინფრასტრუქტურის განვითარების სფეროებზე, განსაკუთრებით სასტუმროების მშენებლობის აუცილებლობასა და მნიშვნელობაზე ისაუბრა. ,,ტურისტული ინფრასტრუქტურის სწრაფი მშენებლობა და განვითარება ერთ-ერთი მნიშვნელოვანი საკითხია. ვფიქრობ, დედაქალაქის სხვადასხვა უბნებში კიდევ უფრო მეტი სასტუმრო უნდა გაიხსნას, რაც ახალი სამუშაო ადგილების გაჩენას და შესაბამისად, მოსახლეობის დასაქმებას შეუწყობს ხელს”,- განაცხადა საკრებულოს თავმჯდომარემ.
გიორგი ალიბეგაშვილმა ევროპის ახალგაზრდულ ოლიმპიურ ფესტივალსა და მის ფარგლებში ვიზიტორების მოსალოდნელ ზრდაზეც ისაუბრა და აღნიშნა, რომ სასტუმროების მშენებლობა ტურისტული აქტივობის პერიოდში განსაკუთრებით მნიშვნელოვანია.
71 ნომრიანი სასტუმრო ”Iveria Inn’ ტურისტული და ბიზნეს კლასისთვის არის განკუთვნილი.
ამჟამად სასტუმროში 42 ადამიანია დასაქმებული და მათი რიცხვი კიდევ გაიზრდება.
შენობა ადაპტირებულია შშმ პირებისთვის. აღსანიშნავია, რომ სასტუმრო მთლიანად ქართული ინვესტიციებით აშენდა, რომლის ოდენობა 5 000 000 ლარამდეა.