თბილისის მერის დავით ნარმანიას ინფორმაციით, სტიქიის შედეგად დაღუპულთა რაოდენობა ხუთამდე გაიზარდა. ამის შესახებ დავით ნარმანიამ
ტელეკომპანია “რუსთავი 2”-ის ეთერში განაცხადა.
მისი თქმით, ამ ეტაპზე რამდენიმე ადამიანის ძებნა მიმდინარეობს. მისივე თქმით, თბილისის მერია გარდაცვლილთა ოჯახებს მაქსიმალურად დაუდგება გვერდში.
“ძებნის პროცესი უფრო აქტიურ ფაზაში შევიდა და იმდენად არ ჭირს ვიდრე ღამის განმავლობაში იყო. წყალი მდინარე ვერეს ხეობაში მინიმალურ დონეზეა დაწეული და აქედან გამომდინარე, ძალიან ინტენსიურად ვმუშაობთ. პარალელურ რეჟიმში მიმდინარეობს გაწმენდითი სამუშაოები”, – განაცხადა ნარმანიამ.
მისივე თქმით, ამჟამად სამაშველო სამუშაოების ძირითადი ნაწილი უკვე სრულდება.
“მთელი ღამის განმავლობაში მუშაობდნენ სამაშველო სამსახურები, თავდაცვის სამინისტროს შესაბამისი სამსახურები, საპატრულო პოლიცია, თბილისის მერიის სამსახურები. დაკარგული ადამიანების ძირითადი ნაწილი ნაპოვნი და გამოყვანილია. ეს ადამიანები გადაყვანილები არიან სასწრაფო სამსახურის დახმარების ბრიგადების მეშვეობით საავადმყოფოებში. მათი უმეტესობა აბსოლუტურად ჯანმრთელია”, – აღნიშნა თბილისის მერმა.
