მოხალისეებს, რომლებიც კატასტროფის ადგილებზე მუშაობენ და შესაბამისად ტალახთან უწევთ შეხება, არის რისკ ფაქტორები, რომ საფრთხის წინაშე აღმოჩნდნენ. ინფორმაციას ჯანმრთელობის დაცვისა და სოციალური უზრუნველყოფის სამინისტრო ავრცელებს. კანის ტალახთან ან მიწასთან შეხებისას, ჩნდება ტეტანუსის ჩხირების შეჭრის საშიშროება.
სამინისტრო განცხადებას ავრცელებს, რომელსაც უცვლელად გთავაზობთ: “ანტიტეტანურ ვაქცინასთან დაკავშირებით ჯანდაცვის სამინისტრო გაცნობებთ, რომ ვაქცინაცია საყოველთაო ჯანდაცვის პროგრამით უფასოა პროგრამაში ჩართულ ყველა კლინიკაში. ასევე უფასოა ვაქცინაცია იმუნიზაციის ცენტრში, რომელიც მდებარეობს ტაშკენტის N10-ში და მუშაობს 24 საათიან რეჟიმში. სტიქიის ზონაში მომუშავე მოხალისეებს რეკომენდაციებს ადგილზევე აძლევენ დაავადებათა კონტროლის ეროვნული ცენტრის ხელმძღვანელები. შეგახსენებთ, რომ ანიტეტანური ვაქცინის გაკეთების საჭიროება დგება დაზიანებულ კანთან მიწის ან ტალახის მოხვედრის შემთხვევაში“.
ჯანდაცვის სამინისტრო საკუთარ ინტერნეტ გვერდზე ავრცელებს ასევე რჩევებს სტიქიის ზონაში მომუშავე მოხალისეებისთვის:
როგორ დავიცვათ თავი ინფექციებისაგან:
• ეპიდემიის გავრცელების საფრთხე ცხოველების ლეშებთან დაკავშირებით მინიმალურია. მათი მოძიების შემთხვევაში, მიმართეთ სამაშველო სამსახურს
• დალიეთ მხოლოდ ბოთლის წყალი
• არ გამოიყენოთ საკვებად მალფუჭადი ან დაბინძურებული პროდუქტი
• კვების, ტუალეტით სარგებლობისას, სიგარეტის მოწევის წინ და ნებისმიერი დაბინძურების შემთხვევაში დაიბანეთ ხელები სუფთა წყლითა და საპნით
• მუშაობისას სხეული მაქსიმალურად დაიფარეთ ტანსაცმლითა და ფეხსაცმლით
• სითბური და მზის დაკვრის თავიდან აცილების მიზნით ჩაიცვით ღია ფერის ტანსაცმელი და გამოიყენეთ ქუდები და თავსაბურავები
• ნუ იმუშავებთ შიშველი ხელებით, გამოიყენეთ სამუშაო ხელთათმანები
• მტვრისაგან თავის დასაცავად გამოიყენეთ ნიღბები
• გაკაწვრის ან კანის სხვა დაზიანების შემთხვევაში ინფექციის თავიდან აცილების მიზნით, მათ შორის ტეტანუსის, ჩამოიბანეთ ნებისმიერი ჭრილობა საპნით და სუფთა წყლით და მიმართეთ სამედიცინო პუნქტებს. ტეტანუსის აცრის მისაღებად 24 საათის განმავლობაში მიმართეთ იმუნიზაციის ცენტრს – ქ.თბილისი, ტაშკენტის ქუჩა #10.
• ნუ შეეჭიდებით ისეთ სამუშაოს, რომელიც აღემატება თქვენს ძალებს, განსაკუთრებით ორსულები და მცირეწლოვანები
• დაიცავით ჰიგიენის წესები და გაუფრთხილდით თქვენს ჯანმრთელობას
დამატებითი შეკითხვების შემთხვევაში შეგიძლიათ დაუკავშირდეთ დაავადებათა კონტროლის ცენტრის თანამშრომლებს შემდეგ ტელეფონის ნომრებზე: 595956156; 595956151 ან დარეკეთ ჯანდაცვის სამინისტროს ცხელ ხაზზე 15 05
