დღეს, ცნობილი ქართველი რეჟისორი, რუსთაველისა და მარჯანიშვილის პრემიების ლაურეატი და თბილისის საპატიო მოქალაქე გიგა ლორთქიფანიძე გარდაიცვალა.
გიგა ლორთქიფანიძე 1927 წელს ქ. თბილისში დაიბადა. გახლდათ ასზე მეტი სპექტაკლის და 4 ფილმის, მათ შორის – „დათა თუთაშხიასა“! და „თეთრი ბაირაღების“ ავტორი.
საქართველოს კულტურისა და ძეგლთა დაცვის სამინისტრო ამ სამწუხარო ფაქტს ეხმაურება და საკუთარ საიტზე სამძიმრის წერილს აქვეყნებს:
„საქართველოს კულტურისა და ძეგლთა დაცვის სამინისტრო იუწყება, რომ გარდაიცვალა საქართველოს სახალხო არტისტი, საქართველოს შოთა რუსთაველის სახელობის თეატრისა და კინოს სახელმწიფო უნივერსიტეტის პროფესორი, რუსთაველისა და მარჯანიშვილის, სახელმწიფო პრემიების ლაურეატი, ღირსების ორდენის კავალერი, თეატრისა და კინოს რეჟისორი გიგა ლორთქიფანიძე.
საქართველოს კულტურისა და ძეგლთა დაცვის მინისტრი გურამ ოდიშარია ღრმა მწუხარებას გამოთქვამს გიგა ლორთქიფანიძის გარდაცვალების გამო და სამძიმარს უცხადებს გარდაცვლილის ოჯახს, კოლეგებსა და მისი ნიჭის თაყვანისმცემლებს.“
13.06.13
