არგენტინაში საქართველოს საგარეო საქმეთა მინისტრის ვიზიტის ფარგლებში, არგენტინასა და საქართველოს შორის უვიზო მიმოსვლის შესახებ შეთანხმებას მოეწერა ხელი.
როგორც “თბილისი თაიმსს” საგარეო საქმეთა სამინისტროდან აცნობეს, შეთანხმებას ხელი მოაწერეს საქართველოს საგარეო საქმეთა მინისტრმა თამარ ბერუჩაშვილმა და არგენტინის რესპუბლიკის საგარეო საქმეთა მინისტრმა ექტორ ტიმერმანმა. დოკუმენტი ძალაში ორივე მხარის მიერ შესაბამისი შიდასახელწიფოებრივი პროცედურების დასრულებიდან ერთ თვეში შევა.
არგენტინის საგარეო საქმეთა სამინისტროში გამართულ შეხვედრაზე მხარეებმა ასევე მიმოიხილეს ორმხრივი თანამშრომლობის აქტუალური საკითხები. აღინიშნა, რომ ქვეყნებს შორის უვიზო მიმოსვლა ხელს შეუწყობს ტურისტული, კულტურული და ეკონომიკური კავშირების გააქტიურებას და განაპირობებს ორივე ქვეყნის ცნობადობის გაზრდას შესაბამის რეგიონებში.
ვიზიტის ფარგლებში ასევე ხელი მოეწერა კულტურის სფეროში თანამშრომლობის, საბაჟო სფეროში ადმინისტრაციული ურთიერთდახმარების შესახებ შეთანხმებებს; მემორანდუმს საქართველოსა და არგენტინის რესპუბლიკას შორის ეკონომიკური და სავაჭრო თანამშრომლობის შესახებ და ურთიერთგაგების მემორანდუმს საქართველოსა და არგენტინის რესპუბლიკის კომპეტენტურ უწყებებს შორის საგადასახადო მიზნებისათვის ინფორმაციის ავტომატური გაცვლის შესახებ. როგორც საგარეო უწყებაში განმარტავენ, აღნიშნული შეთანხმებების იმპლემენტაცია საქართველოსა და არგენტინას შორის თანამშრომლობის შემდგომ განვითარებას განაპირობებს და ხელს ხალხთაშორისი კავშირების გაღრმავებას შეუწყობს.
არგენტინაში ვიზიტის ფარგლებში თამარ ბერუჩაშვილი არგენტინის ვიცე-პრეზიდენტსა და სენატის თავმჯდომარეს ამადო ბუდუს შეხვდა, ასევე საჯარო ლექცია წაიკითა არგენტინის საერთაშორისო ურთიერთობათა ინსტიტუტში.
ლათინური ამერიკის ტურნეს ფარგლებში საქართველოს საგარეო საქმეთა მინისტრი 24-26 ივნისს ოფიციალური ვიზიტით ურუგვაისა და ჩილეს ეწვევა, სადაც გაიმართება მაღალი დონის შეხვედრები. ორივე ქვეყანასთან ხელი მოეწერება ორდინალური პასპორტის მფლობელთათვის უვიზო მიმოსვლის შესახებ შეთანხმებას.
