საბერძნეთის ფინანსთა მინისტრის ინფორმაციით, სამ კვირიანი “არდადეგების” შემდეგ, საბერძნეთის ბანკები 20 ივლისს გაიხსნება, თუმცა ნაღდი ფულის მიღების მხრივ, გარკვეული შეზღუდვები მაინც შენარჩუნდება.
საბერძნეთის ფინანსთა მინისტრის მიერ გამოცემულ საკანონმდებლო აქტში აღნიშნულია, რომ 20 ივლისს ბანკების ყველა ფილიალი გაიხსნება.
“ორშაბათს, 20 ივლისს გასდის ვადა საკანონმდებლო აქტის მოქმედებას, რომლითაც შემოღებული იქნა საბანკო “არდადეგები”. ორშაბათს ბანკების ყველა ფილიალი გაიხსნება, გაფართოვდება კაპიტალის ბრუნვის კონტროლის ფარგლებში ნებადართული საბანკო ოპერაციების რაოდენობა. ნებადართული საბანკო ოპერაციები დეტალურადაა მოცემული ახალ საკანონმდებლო აქტში”, – ნათქვამია საბერძნეთის ფინანსთა მინისტრის განცხადებაში.
საბერძნეთში მსხვილი ფინანსური ოპერაციების განხორციელება, კვლავ ფინანსთა სამინისტროში მოქმედი სპეციალური კომისიის ნებართვით იქნება შესაძლებელი.
ახალ საკანონმდებლო აქტში, ასევე, აღნიშნულია, რომ ბანკის მომხმარებლები ანგარიშიდან დღეში 60 ევროზე მეტს ვერ გაიტანენ. თუმცა, თუკი თანხა რამდენიმე დღის განმავლობაში არ მოხსნილა, შესაძლებელია დაგროვილი ფულის გატანა, მაგრამ თანხა 420 ევროს არ უნდა აღემატებოდეს.
აღნიშნული შეზღუდვები, როგორც ბერძნული, ისე უცხოური ბანკების მომხმარებლებზე ვრცელდება.
შეგახსენებთ, რომ საბერძნეთის ბანკები 29 ივლისს, ევროპის ცენტრალური ბანკიდან მოწოდებების შეწყვეტისა და ლიკვიდირებულობის უკმარისობის გამო დაიხურა. ამავე პერიოდში იქნა შემოღებული ნაღდი ფულის გატანაზე შეზღუდვები, რომელიც დღეში 60 ევროს არ აღემატებოდა.
