რეგიონული განვითარებისა და ინფრასტრუქტურის მინისტრის, დავით ნარმანიას განცხადებით, მის უწყებაში პრემიების საკითხის მოწესრიგება იგეგმება. ამის შესახებ დავით ნარმანიამ ჟურნალისტებს მთავრობის სხდომის დასრულების შემდეგ განუცხადა.
მინისტრი ახალგაზრდა იურისტთა ასოციაციის გავრცელებულ განცხადებას გამოეხმაურა სამინისტროებში პრემიების გაცემასთან დაკავშირებით.
როგორც დავით ნარმანიამ განმარტა, პრემიებთან დაკავშირებით მის სამინისტროში მოქმედებს შემდეგი პრინციპი: დეპარტამენტის ხელმძღვანელი არჩევს მის დეპარტამენტში თანამშრომელს, რომელმაც თვის განმავლობაში ზეგანაკვეთურად იმუშავა, ან შეასრულა განსაკუთრებული დავალება.
“ყოველთვის პრემია ყველას ნამდვილად არ ეძლევა, არამედ, ეძლევა მხოლოდ ცალკეულ თანამშრომელს, რომელსაც შესბამისი ზეგანაკვეთური სამუშაო აქვს შესრულებული და გარკვეული მიღწევები. მაგრამ, მე მაინც უკმაყოფილო ვარ. მქონდა მოადგილეებთან ამ საკითხზე საუბარი, რომ შევიმუშაოთ უფრო მეტად სისტემატიზირებული წესი, რომლის მიხედვითაც, უფრო ობიექტურად მოხდება პრემიების გადანაწილება. თუმცა კიდევ ვადასტურებ, რომ ყოველთვის ყველა თანამშრომელი არ იღებს პრემიას. ასევე არ იღებენ პრემიას ხელფასის ერთი ოდენობით”, – განაცხადა დავით ნარმანიამ.
მისივე თქმით, პრემიის რაოდენობა ზოგ შემთხვევაში შეიძლება იყოს 200-300 ლარი და შეიძლება ზოგიერთ შემთხვევაში ცოტა მეტიც იყოს.
“თუმცა, სისტემატიზაციას და ამ სისტემის მოწესრიგებას აუცილებლად ვაპირებთ”, – დასძინა დავით ნარმანიამ.
ახალგაზრდა იურისტთა ასოციაციის ინფორმაციით, ახალი ხელისუფლების პირობებში, ყველაზე მეტი პრემია თავდაცვაში, ფინანსთა სამინისტროსა და პარლამენტში გაიცა.
20.06.13
