სასამართლოს გადაწყვეტილებით ოდესაში გეი-აღლუმის ჩატარება აიკრძალა

ოდესის ოლქის ადმინისტრაციულმა სასამართლომ ოდესაში თანასწორობის მარშის ჩატარება აკრძალა, რომელიც ლგბტ საზოგადოების წარმომადგენლების მიერ იგეგმებოდა.

სააგენტო „ინტერფაქს – უკრაინას“ ინფორმაციით, გადაწყვეტილება სასამართლომ საკრებულოს სარჩელის საფუძველზე მიიღო. ოდესის საქალაქო საბჭოს აღმასრულებელმა კომიტეტმა, საოლქო სასამართლოს სარჩელით 12 აგვისტოს მიმართა. საკრებულოს პოზიციას მილიციის საქალაქო სამმართველოც იზიარებდა. სარჩელში საკრებულომ, „პრაიდ-2015“-ის ოდესის საორგანიზაციო კომიტეტის უფროსისთვის, 13-16 აგვისტოს პერიოდში აკრძალვის გზით მშვიდობიანი შეკრების უფლების შეზღუდვა მოითხოვა.

სარჩელში არგუმენტად მოყვანილი იყო, რომ დაგეგმილი ღონისძიების მიმართ, ქალაქის მოსახლეობაში უარყოფითი განწყობა სუფევს, ასევე, მარშის მონაწილეებზე ძალადობის განხორციელების მაღალი ალბათობა არსებობს.

სასამართლომ მიიჩნია, რომ ერთიანობის მარშს შეეძლო გამოეწვია რეალური საფრთხე და ქალაქში საზოგადოებრივ წესრიგს დამუქრებოდა. ამის გამო სასამართლომ „პრაიდ – 2015“-ის თავმჯდომარეს და ოდესის საორგანიზაციო კომიტეტის მდივანს 15 აგვისტოს თანასწორობის მარშის ჩატარება აუკრძალა.

მარშის ჩატარების კატეგორიულად წინააღმდეგნი გამოვიდნენ სასულიერო პირები. სხვადასხვა რელიგიური კონფესიების წარმომადგენლებმა სპეციალურ ბრიფინგზე განაცხადეს, რომ დაგეგმილი ღონისძიება კატეგორიულად ეწინააღმდეგება ბიბლიას. მათ ქალაქის საბჭოს მარშის აკრძალვის თხოვნითაც მიმართეს.