ოქტომბერში საგარეჯოსა და მარტვილში დაგეგმილ შუალედურ არჩევნებში მაჟორიტარ დეპუტატებად კოალიცია ” ქართული ოცნება” თამარ ხიდაშელისა და სოსო დანელიას კანდიდატურებს წარადგენს- ამის შესახებ კოალიციის ლიდერმა ირაკლი ღარიბაშვილმა განაცხადა. მთავრობის მეთაური დარწმუნებულია, რომ ეს ხელისუფლების მიერ ჩატარებული კიდევ ერთი წარმატებული არჩევნები იქნება. “დღეს მინდა საზოგადოებას წარვუდგინო კოალიცია „ქართული ოცნების“ მაჟორიტარი დეპუტატობის კანდიდატები შესაბამისი საარჩევნო ოლქებისათვის. საგარეჯოში ჩვენი კოალიციის მაჟორიტარობის კანდიდატი გახლავთ თამარ ხიდაშელი. მინდა თავიდანვე აღვნიშნო, რომ ჩვენი ეს არჩევანი კიდევ ერთხელ მოწმობს იმას, თუ როგორ მნიშვნელობას ვანიჭებთ კვალიფიციური, პრინციპული და პროგრესულად მოაზროვნე ქალების პოლიტიკაში ჩაბმას. თამარ ხიდაშელი გახლავთ იურისტი. მას განათლება მიღებული აქვს დიდ ბრიტანეთში და აქვს არასამთავრობო ორგანიზაციებში მუშაობის დიდი გამოცდილება. ამჟამად ქალბატონი თამარი მუშაობს ევროკავშირის პროექტში და არის ევროკავშირთან ასოცირების მიმართულებით არაერთი კვლევისა და მონიტორინგის ანგარიშის ავტორი; მარტვილის მაჟორიტარობის კანდიდატად წარმოგიდგენთ ბატონ სოსო დანელიას.
