ონლაინ კონსულტაცია სასკოლო თემატიკაზე

დამეთანხმებით, რომ საქართველოში სასკოლო განათლების სისტემა აუცილებლად დასახვეწია. მრავალი რეფორმისა თუ მცდელობის მიუხედავად, ამ კუთხით მაინც ბევრი შეკითხვა არსებობს. დირექტორით უკმაყოფილო მასწავლებლები, მასწავლებლით უკმაყოფილო მშობლები და მოსწავლეები, მოსწავლეებით უკმაყოფილო სკოლის ადმინისტრაცია და ასე უსასრულოდ. კანონმდებლობა, რომელიც ძალიან ცოტამ თუ იცის, უფლებები, რომელთა შესახებაც ბევრს არც კი სმენია და უამრავი პრობლემა, რომელიც სკოლაში სწავლისა თუ სწავლების პერიოდში იჩენს თავს – ეს ყველაფერი ჩვენი საგანმანათლებლო სისტემის ნაწილია.

როგორც აღვნიშნე, სასკოლო განათლებასთან დაკავშირებით ბევრი კითხვა არსებობს. ბევრმა დაინტერესებულმა პირმა არ იცის, სად მოიძიოს მისთვის საჭირო ინფორმცია, ბევრმაც კი იცის, თუმცა ეს საკმაოდ ხანგრძლივი და დამღლელი პროცესია. იმისათვის, რომ არავის უფლება არ დაირღვეს და ჩვენ სასკოლო განათლებასთან დაკავშირებული ნებისმიერი ინფორმაცია ძალიან კომფორტულად და მარტივად მივიღოთ, არასამთავრობო ორგანიზაცია „სასკოლო კვლევების ცენტრმა“ საინტერესო პროექტი შეიმუშავა – ონლაინ კონსულტაციები ნებისმიერი ადამიანისთვის.

ცენტრი პედაგოგებს, სკოლის მოსწავლეებს, მშობლებს, კერძო და საჯარო სკოლის ადმინისტრაციებს, სხვა დაინტერესებულ პირებსა თუ ორგანიზაციებს სასკოლო თემატიკასთან დაკავშირებულ ნებისმიერ პრობლემატურ საკითხზე ონლაინ კონსულტაციებს სთავაზობს. მათი მიზანი განათლების მუშაკებისთვის ყოველდღიურ საქმიანობაში ხელშეწყობა, საზოგადოების ცნობიერების ამაღლება და მოსწავლეებისთვის, მშობლებისა და მასწავლებლებისთვის პრობლემების უკეთ გადაჭრაში დახმარებაა. კონსულტაციები 15 სექტემბერს დაიწყო. უფრო დეტალური ინფორმაციის მისაღებად ჩვენ „სასკოლო კვლევების ცენტრის“ ხელმძღვანელს, მუხრან გულიაშვლს ვესაუბრეთ:

რა იყო აღნიშნული წამოწყების წინაპირობა? რატომ ჩათვალეთ, რომ საჭიროა ასეთი ტიპის კონსულტაციები?

– ჩვენს ცენტრს აქამდეც ბევრი ადამიანი მომართავდა. ჩვენს ელ-ფოსტასა და Facebook-ის გვერდზე კითხვებს უამრავი მშობელი, მოსწავლე, პედაგოგი თუ სკოლის ადმინისტრაცია აგზავნიდა. ისინი სხვადასხვა საკითხთან დაკავშირებით კონსულტაციების გაწევას გვთხოვდნენ. წელს გადავწყვიტეთ, რომ ამისთვის უფრო მასიური სახე მიგვეცა და სასურველი ინფორმციის მიღების საშუალებაც უფრო მეტ ადამიანს ჰქონოდა. სწორედ ეს უძღვოდა წინ ჩვენს ინიციატივას.

ძირითადად, რა პრობლემების შესახებ გსმენიათ მასწავლებლებისგან, მოსწავლეებისა თუ მშობლებისგან?

– ყველაზე ხშირია პრობლემური საკითხები კონტრაქტებთან დაკავშირებოთ. პედაგოგები, ძირითადად, საკანონმდებლო ბაზასთან დაკავშირებით მოგვმართავენ, ახალი სქემის დეტალები აინტერესებთ. ასევე ხშირია შემთხვევა, როდესაც მასწავლებელი დირექტორის მიერ განხორცელებული პოლიტიკითაა უკმაყოფილო. მშობლები უმეტესწილად ინტერესდებიან იმით, თუ როგორ მოექცნენ თავიანთ შვილებს მაშინ, როდესაც ისინი ცუდად იქცევიან ან გარდატეხის ასაკში თავისებური ქცევით გამოირჩევიან. ასევე აქტუალურია კითხვები სკოლის შერჩევასთან ან მოსწავლის სტატუსის შეჩერებასთან დაკავშირებით მაშინ, როდესაც ბავშვი სასწავლებლად საზღვარგარეთ მიდის. დირექტორები საკანონმდებლო რეგულაციებით ინტერესდებიან. რაც შეეხება მოსწავლეებს, მათთვის პრიორიტეტული თავიანთი უფლებებია. ჩემი ძალიან დიდი სურვილია, რომ რაც შეიძლება მეტმა მოსწავლემ მოგვმართოს, რადგანაც ჩვენ მათ ინფორმაციას მივაწვდით არა მხოლოდ პრობლემური საკითხების, არამედ მათთვის საინტერესო გაცვლითი თუ სხვა პროგრამების შესახებ. მინდა აღვნიშნო, რომ ჩვენი კონსულტაციები კონფიდენციალურია და უფრო დეტალურად ვერაფერს გეტყვით.ამ განხრით მუშაობა 15 სექტემბრიდან დავიწყეთ და უკვე დიდი აქტიურობაა, განსაკუთრებით რეგიონებიდან. ვიმედოვნებ, ასეც გაგრძელდება.

ვინ გაუწევს მსურველებს კონსულტაციას? სპეციალურად გადამზადდნენ ისინი აღნიშნული სამუშაოსთვის?

– ჩვენთან შექმნილია სპეციალური საკონსულტაციო საბჭო. მასში შედიან ფსიქოლოგები, მკვლევარები, სკოლის სისტემაში მუშობის გამოცდილების მქონე ადამიანები, ისინი თავიანთი პროფესიონალიზმის და მაღალი კვალიფიკაციის გათვალისწინებით შევარჩიეთ. ამასთან, კონსულტაციების გაცემაში ჩართულია ჩვენი რამდენიმე უცხოელი პარტნიორი. ერთ-ერთი მათგანი ჰარვარდის უნივერსიტეტის პროფესორია და კონკრეტული საკითხის განხილვაში ისიც იღებს მონაწილეობას.

რა ტიპის კომუნიკაცია შედგება დაინტერესებულ პირსა და ცენტრის წარმომადგენლებს შორის?

– მომხმარებელი შემოდის ჩვენს საიტზე და რეგისტრირდება. ამისთვის არის სპეციალური ბლანკი, რომელიც უნდა შეავსოს. საჭიროა მინიმალური ინფორმაცია: სახელი, გვარი, სტატუსი – სტუდენტი,მოსწავლე, მასწავლებელი და ა.შ და სკაიპის მისამართი. ეს მნიშვნელოვანია, ვინაიდან კონსულტაცია ხდება სკაიპის საშუალებით. თითოეულ მომხმარებელთან ინდივიდუალური გასაუბრება მიმდინარეობს. კვირის განმავლობაში ადამიანები რეგისტრირდებიან, თუ მათ მიერ დასმულ კითხვაზე პასუხის გაცემას დრო არ სჭირდება, ჩენ მაშინვე ვუკავშირდებით. თუ საკითხი უფრო ღრმა და გამოსაკვლევია, ვინიშნავთ შემოსულ პრობლემას, კვირის განმავლობაში განვიხილავთ, შაბათ-კვირას კი საღამოს 8 საათიდან 10 საათამდე კონსულტაციები იგეგმება. თითოეული მომხმარებლისთვის თითქმის 20 წუთია გამოყოფილი. ინფორმაცია მათ არაუმეტეს 10 დღის განმავლობაში მიეწოდებათ.

www.rcs.ge – ეს არის “სასკოლო კვლევების ცენტრის“ ვებ-გვერდი, სადაც კითხვის გაგზავნას და სასურველი ინფრმაციის მიღებას შეძლებთ.

ესაუბრა

თეა ღვინაძე