“ჩვენი ამოცანა არის ადგილობრივი მოხმარება გავზარდოთ იმით, რომ მივაწვდით უფრო ხარისხიან პროდუქტს უფრო იაფად”

ჩვენი ამოცანა არ არის იმპორტის ჩანაცვლება, ამოცანაა მთლიანი ბაზრის მოხმარების გაზრდა, – ამის შესახებ ეკონომიკისა და მდგრადი განვითარების მინისტრმა, დიმიტრი ქუმსიშვილმა სასტუმრო “თბილისი მარიოტში” განაცხადა, სადაც “საქართველოს ინდუსტრიული განვითარების ჯგუფის” მიერ მომზადებული საინვესტიციო პროექტების პრეზენტაცია გაიმართა. როგორც ქუმსიშვილმა აღნიშნა, ამოცანა არის ბევრი ახალი მიმართულების მოძებნა. “ჩვენი ამოცანა არის ბევრი ახალი მიმართულების მოძებნა, რადგან მხოლოდ ახალ მიმართულებებშია შესაძლებელი რეალურად იმ კონკურენტული უპირატესობის გაღრმავება და აღმოჩენა, რომელიც ჩვენს ქვეყანას სჭირდება. ამოცანა არ არის იმპორტის ჩანაცვლება, ამოცანა არის მთლიანი ბაზრის მოხმარების გაზრდა. თუ ჩვენ ვახერხებთ და კონკურენტუნარიან პროდუქტს ვქმნით, რა თქმა უნდა, ადგილობრივ ბაზარზეც შესაძებელია, რომ უფრო ხარისხიანი და იაფი პროდუქცია იყოს მიწოდებული და ამას უკვე ბაზარი განსაზღვრავს. ჩვენი ამოცანა არის ადგილობრივი მოხმარება გავზარდოთ იმით, რომ მივაწვდით უფრო ხარისხიან პროდუქტს უფრო იაფად, ვიპოვოთ ის საექსპორტო პოტენციალი, რომელიც ჩვენი ქვეყნისთვის მნიშვნელოვანია”, – განაცხადა დიმიტრი ქუმსიშვილმა. პროექტების პრეზენტაციას ქართული ბიზნესსექტორის წარმომადგენლები დაესწრნენ.