საქართველოს პრეზიდენტი გიორგი მარგველაშვილი, ვაშინგტონში ვიზიტის ფარგლებში, სტრატეგიული და საერთაშორისო კვლევების ცენტრის წევრებს შეხვდა. საქართველოს პრეზიდენტის ადმინისტრაციის პრესსამსახურის ინფორმაციით, ქვეყნის პირველმა პირმა პირისპირ საუბარი გამართა სტრატეგიული და საერთაშორისო კვლევების ცენტრის პრეზიდენტ ჯონ ჰეიმრესთან და ცენტრის მრჩეველ ზბიგნევ ბრზეჟინსკისთან. დახურული შეხვედრა მრგვალი მაგიდის ფორმატში წარიმართა და მათ რეგიონში არსებული უსაფრთხოების საკითხებსა და გამოწვევებზე ისაუბრეს. “ქვეყნის პირველმა პირმა აქცენტი დასავლეთის როლის კიდევ უფრო გაძლიერებაზე გააკეთა და აღნიშნა, რომ აუცილებელია, აშშ-მ და ევროპამ ტრადიციული ლიდერობა ითავონ, რათა საქართველოს ტერიტორიული მთლიანობის მხარდაჭერის და არაღიარების პოლიტიკა კიდევ უფრო გაძლიერდეს. შეხვედრისას საუბარი შეეხო საქართველოს ნატო-სა და ევროკავშირში ინტეგრაციის საკითხებს. დელეგაციამ აქცენტი გაამახვილა საქართველოში მიმდინარე იმ რეფორმებზე, რომელსაც ჩვენი ქვეყანა ინტეგრაციის პროცესის დასაჩქარებლად ახორციელებს”, – აცხადებენ საქართველოს პრეზიდენტის ადმინისტრაციის პრესსამსახურში. მათივე ინფორმაციით, სტრატეგიული და საერთაშორისო კვლევების ცენტრის ექსპერტები საქართველოში არსებული შიდა პოლიტიკითაც დაინტერესდნენ და ქვეყანაში არსებული მდგომარეობის შესახებ ინფორმაცია პირადად პირველი პირისგან მოისმინეს.
