საქართველოს პრემიერ-მინისტრმა ირაკლი ღარიბაშვილმა აზიის განვითარების ბანკის (ADB) მუდმივი წარმომადგენლობის ახალ დირექტორ იეშიმ ელჰან-კაიალართან გაცნობითი ხასიათის შეხვედრა გამართა.
როგორც “თბილისი თაიმსს” საქართველოს მთავრობის ადმინისტრაციის პრესსამსახურიდან აცნობეს, მხარეებმა თანამშრომლობის საკითხებზე იმსჯელეს. საუბარი შეეხო საქართველოში აზიის განვითარების ბანკის მხარდაჭერით დაფინანსებულ პროექტებს და სამომავლო გეგმებს. ხაზი გაესვა 2014-2018 წლების თანამშრომლობის სტრატეგიის (CPS) მნიშვნელობას, რომლის მიხედვით საქართველო ADB-სგან მხარდაჭერას მიიღებს შემდეგ სფეროებში: ენერგო სექტორის, გზების, წყალმომარაგებისა და წყალარინების სისტემების ინფრასტრუქტურა და მომსახურება; საჯარო სექტორის მართვა; კერძო სექტორის განვითარება; ფინანსური სექტორის გაღრმავება და ინკლუზიურობა; მმართველობა; გენდერული თანასწორობა და ცოდნაზე დამყარებული გადაწყვეტილებების მიღება.
საქართველოს მთავრობის მეთაურმა იეშიმ ელჰან-კაიალარს წარმატებები უსურვა. იეშიმ ელჰან-კაიალარი აზიის განვითარების ბანკის მუდმივი წარმომადგენლობის დირექტორის თანამდებობაზე მუშაობას 2015 წლის 30 სექტემბერიდან შეუდგა. აღნიშნულ პოზიციაზე დანიშვნამდე, იგი ADB-ს საჯარო მართვის პორტფელს ხელმძღვანელობდა ცენტრალური და დასავლეთ აზიის 10 ქვეყანაში. მას მსოფლიოს 25 ქვეყანაში განვითარების სააგენტოებში, კერძო სექტორსა და უმაღლეს სასწავლო დაწესებულებებში მუშაობის 25 წლის გამოცდილება გააჩნია. ელჰან-კაიალარი კალიფორნიის უნივერსიტეტის ეკონომიკის მეცნიერებათა დოქტორია და გააჩნია ჰარვარდისა და მიჩიგანის უნივერსიტეტების კვალიფიკაცია ფინანსებისა და მართვის სფეროში.
