თბილისის მერიისინფორმაციით, თბილისში, მარშალ გელოვანის გამზირზე მდინარე დიღმულაზე მდებარე ხიდის რეკონსტრუქცია სრულდება.
თბილისის მერმა დავით ნარმანიამ და მერის მოადგილე გიორგი სოლომონიამ ხიდზე მიმდინარე სარეკონსტრუქციო სამუშაოები დაათვალიერეს.
“ხიდი ძლიერად იყო დაზიანებული და აქედან გამომდინარე, მთლიანად მოხდა მისი აღდგენა. ხიდი კაპიტალურად გაკეთდა, გამოიცვალა საყრდენი ნაწილი, ამჟამად სრულდება ზედა საფარის დაგების სამუშაოები. ნაცვლად გათვალისწინებული ოთხი თვისა, სამუშაოები სამ თვეში დასრულდა”, – განაცხადა ნარმანიამ.
თბილისის მერიის ინფორმაციით, სარეაბილიტაციო სამუშაოები 24 საათიან რეჟიმში მიმდინარეობდა და დაგეგმილზე ერთი თვით ადრე დასრულდა. რეაბილიტაციის ბოლო ეტაპზე მიმდინარეობს ასფალტის საფარის დაგება. ობიექტი ექსპლუატაციაში უახლოეს ორ დღეში შევა.
“ხიდის სარეკონსტრუქციო სამუშაოებს შპს “მამისონი” აწარმოებს, დედაქალაქის ბიუჯეტიდან პროექტზე 1 მლნ ლარი დაიხარჯა. მდინარე დიღმულაზე გადასასვლელი ხიდი 1958 წელს დაპროექტდა და აშენდა. ბოლო რეკონსტრუქცია 1970-იან წლებში ჩაუტარდა, ხოლო ბოლო გამოკვლევა 2000 წელს”, – ნათქვამია განცხადებაში.