რუსულმა კოსმოსურმა პროგრამამ მორიგი კრახი განიცადა, ყაზახეთში რუსული კოსმოდრომიდან გაშვებული რაკეტა რომელსაც, ორბიტაზე 3 სანავიგაციო თანამგზავრი უნდა გაეტანა, ისევ ჩამოვარდა.
კოსმოსური ხომალდი გაშვებისთანავე აფეთქდა. რუსული მედია იტყობინება, რომ რაკეტამ, სახელწოდებით “Протон-М” ყაზახეთის ტერიტორიაზე მდებარე კოსმოდრომ „ბაიკანურიდან“ სტარტი 1 ივლისს აიღო.
გაშვებიდან მცირე დროის შემდეგ მან კურსი იცვალა, აალდა და დედამიწაზე ჩამოვარდა. რუსეთის კოსმოსური სააგენტოს ცნობით, “Протон-М” ძრავი ძალიან მალე, სულ რაღაც 17 წამში გამოირთო და „ბაიკანურიდან“ 2 კილომეტრში აფეთქდა. მსხვერპლის, ან ზარალის მოცულობის შესახებ ინფორმაცია არ ვრცელდება. ყაზახეთის საგანგებო სიტუაციების მინისტრის, ვლადიმირ ბოზკოვის განცხადებით, ჰაერში დამწვარმა სარაკეტო საწვავმა ტერიტორია მომწამვლელი ღრუბლით დაფარა. გარემოს დამცველები ზარალს სწავლობენ.
შეგახსენებთ, “Протон-М” მისია გასულ წელსაც წარუმატებლად დასრულდა. „ბაიკანურის“ კოსმოდრომიდან 2012 წლის აგვისტოში გაშვებულმა რაკეტამ ორბიტაზე 2 თანამგზავრის გაყვანა ვერ მოახერხა. ოფიციალური წყაროების მიხედვით, “Протон-М”-ის წარმოებაში და საინჟინრო დაგეგმარებაში შეცდომები იყო დაშვებული.
03.07.13
