დიმიტრი ქუმსიშვილმა მამა ილია კარტოზიას ოჯახს საერთაშორისო საზღვაო ორგანიზაციის მიერ დაწესებული ჯილდო გადასცა.
ეკონომიკისა და მდგრადი განვითარების მინისტრმა, დიმიტრი ქუმსიშვილმა 2014 წელს ადრიატიკის ზღვაში ტრაგიკულად დაღუპული არქიმანდრიტის, მამა ილია კარტოზიას ძმას, ნიკა კარტოზიას ის სიგელი გადასცა, რომლითაც საერთაშორისო საზღვაო ორგანიზაციამ მამა ილია კარტოზია ზღვაში ჩადენილი განსაკუთრებული სიმამაცისთვის დააჯილდოვა.
“მე გასულ კვირას ვიზიტით გახლდით ლონდონში, სადაც საერთაშორისო საზღვაო ორგანიზაციის გენერალურმა მდივანმა კოჯი სეკიმიცუმ პირადად გადმომცა მამა ილია კარტოზიასთვის დაწესებული ეს ჯილდო მისი ოჯახისთვის გადასაცემად. მსურს კიდევ ერთხელ მადლობა გადავუხადო საერთაშორისო საზღვაო ორგანიზაციას და მის ხელმძღვანელს ჩვენი გმირულად დაღუპული თანამემამულის თავგანწირვის განსაკუთრებული დაფასებისთვის და მათ მიერ დაწესებული ეს ჯილდო გადავცე მამა ილია კარტოზიას ძმას, ბატონ ნიკა კარტოზიას. აღსანიშნავია, რომ ასეთი დონის საზღვაო ჯილდო აქამდე საქართველოს არც ერთ მოქალაქეს არ მიუღია”,- განაცხადა ქუმსიშვილმა.
მცხეთის დავით აღმაშენებლის სახელობის მამათა მონასტრის წინამძღვარი, არქიმანდრიტი ილია კარტოზია 2014 წლის 28 დეკემბერს იტალიურ ბორან “Norman Atlantic”-ზე გაჩენილი ხანძრის დროს უბედური შემთხვევის შედეგად გარდაიცვალა. ცეცხლმოკიდებულ გემზე მიმდინარე სამაშველო ოპერაციის დროს, მამა ილიამ სამაშველო ნავში თავისი ადგილი ბავშვიან ქალბატონს დაუთმო, თავად გემბანზე დარჩა და მაშველებმა მისი გადარჩენა ვეღარ შეძლეს.
საერთაშორისო საზღვაო ორგანიზაციამ, რომელიც ზღვაში ჩადენილი განსაკუთრებული სიმამაცისთვის ყოველწლიურად აჯილდოებს სხვადასხვა ადამიანებს, 2014 წელს ტრაგიკულად დაღუპული ქართველი სასულიერო პირი გამოჩენილი განსაკუთრებული სიმამაცისთვის დააჯილდოვა.
“კიდევ ერთხელ მინდა გამოვხატო ჩემი გულისტკივილი მამა ილიას გარდაცვალების გამო, კიდევ ერთხელ მინდა მივუსამძიმრო მის ოჯახს, გამძლეობა ვუსურვო და გადავცე სიგელი, რომელიც არის დამსახურება და კიდევ ერთხელ აღიარება მამა ილიას თავგანწირვისა და სიმამაცისა”, – აღნიშნა ქუმსიშვილმა.
