ახალი 3 ვარსკვლავიანი საერთაშორისო ბრენდის სასტუმრო ქუთაისში მომავალი წლის ბოლომდე გაიხსნება. სასტუმრო, რომელსაც საპარტნიორო ფონდი შპს „კაპიტოლ ჰოლდინგთან“ ერთად აშენებს, პირველი ბრენდირებული სასტუმრო იქნება იმერეთის რეგიონში.
საპარტნიორო ფონდის ინფორმაციით, სასტუმრო ქალაქის ისტორიულ ცენტრში განთავსდება და 40 სტანდარტული და 5 ლუქსის ტიპის ნომერი ექნება. სასტუმროს ინფრასტრუქტურა მოიცავს 3 საკონფერენციო დარბაზს, ღია და დახურული ტიპის კაფე-რესტორანს.
ტურიზმის სექტორში ახალი სასტუმროს პროექტის განხორციელება საპარტნიორო ფონდმა ოფიციალურად ივლისში დაიწყო. პროექტის ღირებულება 3 მილიონი აშშ დოლარია, სადაც ფონდის მონაწილეობა 1.4 მლნ. აშშ დოლარია.
სასტუმროს დეველოპმენტს განახორციელებს კომპანია „სიმეტრია.“ აღსანიშნავია, რომ პარტნიორის ჰოლდინგში შემავალი ერთ-ერთი კომპანია Best Western International-ის ექსკლუზიური წარმომადგენელია საქართველოში.
