წლევანდელი წელი რომის კათოლიკურმა ეკლესიამ საგანგებო საიუბილეო წლად გამოაცხადა და ამასთან დაკავშირებით, ისინი მთელი მსოფლიოს მასშტაბით, „გულმოწყალების კარს“ ხსნიან.
„წმინდა წელი“ საქართველოს კათოლიკურმა ეკლესიამაც აღნიშნა. თბილისის კათოლიკურ საკათედრო ტაძარში სადღესასწაულო წირვა აღევლინა, რომელსაც რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე და სააგენტოს თანამშრომლები ესწრებოდნენ.
„გულმოწყალების კარის“ მნიშვნელობასა და საიუბილეო წლის აღნიშვნის ტრადიციასთან დაკავშირებით „თბილისი თაიმსმა“ კომენტარის გაკეთება საქართველოს კათოლიკური ეკლესიის კანცელარიის გამგეს მამა აკაკი ჭელიძეს სთხოვა. მისი თქმით, საიუბილეო წლის აღნიშვნა ყოველ 25 წელში ერთხელ ხდება, ხოლო ზედსართავი: „გულმოწყალების“ უკავშირდება წლევანდელ იუბილეს და არა ყველას.
„მოგეხსენებათ, კათოლიკურ სამყაროში არსებობს საიუბილეო წლები, რომლებიც ძველ აღთქმაში გვხვდება, როგორც სამართლიანობის, გათავისუფლების, მადლის წელიწადი. მიტევებისა და მონების გათავისუფლების წელი უნდა ყოფილიყო განსაკუთრებულად ძლიერი ნიშანი რჩეული ერის ცხოვრებაში.
ქრისტიანული იუბილეების აღნიშვნა იწყება 1300 წლიდან. თავიდან ისინი ყოველ 100 წელში ერთხელ უნდა ყოფილიყო, შემდეგში ეს მონაკვეთი 50-მდე შემცირდა, ხოლო საბოლოოდ, იმისათვის, რომ ყოველმა ადამიანმა ერთხელ მაინც მოახერხოს საიუბილეო წლის აღნიშვნა, 25 წლით განისაზღვრა (მართლაც, ბოლო საიუბილეო წელი იყო 2000 წელი). ამას გარდა არსებობს რიგგარეშე საიუბილეო წლები (მაგალითად, 1933, 1983, ქრისტეს ჯვარცმისა და აღდგომის იუბილე).
წელს სრულდება ვატიკანის მეორე მსოფლიო კრების დახურვიდან 50–ე წელი და პაპმა ინება გამოეცხადებინდა ღვთიური გულმოწყალებისადმი მიძღვნილ საიუბილეო წლად. ზედსართავი: „გულმოწყალების“ უკავშირდება წლევანდელ იუბილეს და არა ყველას.
ყოველი იუბილეს ნიშანია კარი, ე.წ. საიუბილეო კარი, რომელსაც პაპი ხსნის საზეიმოდ და რომელშიც გავლა მორწმუნისათვის სიმბოლურად აღნიშნავს იმ სულიერ რეალობას, რაც უფლის გავლით სასუფეველში, ღმერთთან თანაზიარებაში შესვლაა. სახარებაში გვხვდება სიტყვები, რომლითაც უფალი თავის თავს კარს ადარებს; როგორც ყოველი სიმბოლოს მნიშვნელობა, ამ შემთხვევაშიც ის გაცილებით ფართოა და თითეული ადამიანისათვის მრავალგვარად შეიძლება ამეტყველდეს,“ – აღნიშნა მამა აკაკი ჭელიძემ.
საიუბილეო წელი რუსთავში მცოხვრებმა კათოლიკური ეკელსიის მრევლმაც აღნიშნა, რომელსაც ასევე რელიგიის სააგენტოს თავჯდომარე ზაზა ვაშაყმაძე ესწრებოდა. აქ „გულმოწყალების კარი“ იმ ადგილზე გაიხსნა, სადაც კათოლიკეები ტაძრის აშენებას გეგმავენ. ჩვენ დავინტერესდით, რამდენად მშვიდობიან ვითარებაში ჩაიარა ღონისძიებამ რუსთავში, რადგან ცნობილია, რომ ქალაქის მცხოვრებნი და მერია ეწინააღმდეგებოდნენ ტაძრის მშენებლობის დაწყებას.
„რუსთავში ჩვენს მიერ შეძენილ მიწის ნაკვეთზე, უკვე სამი წელია უშედეგოდ ვცდილობთ ტაძრის აშენებას. ყველა არსებულ ნებართვაზე ქალაქის მერი დასაბუთების გარეშე არ იძლევა თანხმობას მშენებლობის დაწყებაზე. ამის გამო, საიუბილეო წლისათვის მზადებისას, ეპისკოპოსმა განიზრახა საიუბილეო კარი დაედგა იმ ადგილას, სადაც სწორედ „ღვთიური გულმოწყალების“ ტაძარი უნდა აშენდეს. ამ ლოცვამ ექსცესების გარეშე ჩიარა.“- განაცხადა მამა აკაკი ჭელიძემ.
კათოლიკე ეკლესიის მიერ გამოცხადებული გულმოწყალების წელი 2016 წლის 20 ნოემბრამდე გასტანს.
სოფიკო ნინიკაშვილი
