საქართველოს კანონში „სასოფლო-სამეურნეო კოოპერატივის შესახებ“ ცვლილებებით შემოდის ახალი ცნებები ასოცირებული წევრისა და ასოცირებული წევრის შენატანი, დამატებითი საპაიო შენატანი, საერთო კრება, კოოპერაციული შემოსავალი. დაზუსტდა ტერმინები – ეკონომიკური მონაწილეობა, საპაიო შენატანი და დემოკრატიული მართვა. ამასთან, განისაზღვრა დივიდენდის გაცემისა და სასოფლო-სამეურნეო კოოპერატივის სარეზერვო ფონდში არსებული თანხის განკარგვის წესები.
კანონში ცვლილებით წესდება შეზღუდვა არაწევრებისგან წარმოებული სასოფლო-სამეურნეო პროდუქციის შესყიდვასთან და მომსახურების გაწევასთან დაკავშირებით, კერძოდ, ერთი საანგარიშო წლის განმავლობაში არაწევრებისგან მიღებული პროდუქციის/მომსახურების ღირებულება არ უნდა აღემატებოდეს კოოპერატივის წლიური სასოფლო-სამეურნეო სასაქონლო ბრუნვის 30%-ს.
მეპაიეთა რეესტრის სავალდებულო წარმოების წესი დადგინდება სოფლის მეურნეობის მინისტრის ბრძანებით.
“გრანტების შესახებ” საქართველოს კანონში ცვლილებით სასოფლო-სამეურნეო კოოპერატივების განვითარების სააგენტოს მიენიჭა გრანტის გაცემის უფლება. რაც მნიშვნელოვნად შეამსუბუქებს სასოფლო-სამეურნეო კოოპერატივების განვითარების ხელშემწყობი პროგრამების განხორციელებას.
აღნიშნული ცვლილებები ხელს შეუწყობს კოოპერატივსა და მეპაიეებს შორის წარმოშობილი საწარმოო ურთიერთობების დარეგულირებას, სასოფლო სამეურნეო კოოპერატივის გამართული მოდელის შექმნას, ასევე სასოფლო-სამეურნეო კოოპერატივებს გაუჩნდებათ დამატებითი ფინანსური რესურსების მოზიდვის საშუალება.