საქართველოს შინაგან საქმეთა მინისტრმა, გიორგი მღებრიშვილმა იმ რეფორმებზე ისაუბრა, რომელმაც მისი თქმით, ვიზალიბერალიზაციის დადებით დასკვნაზე, მნიშვნელოვანი გავლენა მოახდინა.
გიორგი მღებრიშვილის თქმით, საქართველომ, სამოქმედო გეგმით გათვალისწინებული ვალდებულებები, მაქსიმალურად ამოწურა.
მღებრიშვილმა, ვიზალიბერალიზაციის პროცესში, შინაგან საქმეთა სამინისტროს განსაკუთრებულ როლზე ისაუბრა და აღნიშნა, რომ ვალდებულებების 60%-ზე მეტი სწორედ მის უწყებაზე მიდიოდა.
მინისტრის განცხადებით, შინაგან საქმეთა სამინისტროს ორგანიზებული დანაშაულის, ნარკოდანაშაულის, ადამიანებით ვაჭრობის წინააღმდეგ უნდა ებრძოლა.
“გატარებული რეფორმებიდან მინდა საზღვარზე გატარებული რეფორმა გამოვყო, რომლის გატარებაშიც ევროკავშირი და ამერიკის შეერთებული შტატები მოგვეხმარნენ. ათობით მილიონი ლარი დაიხარჯა იმისთვის, რომ ინფრასტრუქტურა მოწყობილიყო. საზღვრებზე ინფრასტრუქტურა ძირფესვიანად არის შეცვლილი. ჩვენ ავაშენეთ ოთხი ახალი სექტორი. ყველა სექტორი გადაიარაღდა და ახალი ტექნიკით აღიჭურვა. თამამად შემიძლია გითხრათ, რომ დღეს, საქართველოს საზღვრები, აბსოლიტურად დაცულია”,- განაცხადა გიორგი მღებრიშვილმა.
შინაგან საქმეთა მინისტრი უვიზო მიმოსვლასთან დაკავშირებით, რუსეთის პრეზიდენტის, ვლადიმერ პუტინის მიერ გაკეთებულ განცხადებებსაც გამოეხმაურა.
როგორც მღებრიშვილმა აღნიშნა, ვლადიმერ პუტინის შემოთავაზება მისასალმებელია.
“რაც უფრო მეტ ქვეყანასთან გვექნება უვიზო მიმოსვლა, ეს საქართველოს მოქალაქეებისთვის უკეთესი იქნება”,- აღნიშნა შს მინისტრმა.
ევროკომისიის დასკვნით, საქართველომ ვიზალიბერალიზაციის სამოქმედო გეგმა წარმატებით შეასრულა, რაც იმას ნიშნავს, რომ დადებითი პოლიტიკური გადაწყვეტილების შემთხვევაში, უვიზო მიმოსვლა ამოქმედდება.
