ეროვნული სამეცნიერო ბიბლიოთეკის მოწვევით, თბილისში იტალიური კომპანია CINECA-ს სპეციალისტები იმყოფებიან. საინფორმაციო პორტალის სისტემის შემქმნელი მეცნიერები საქართველოს განათლებისა და მეცნიერების მინისტრის მოადგილეს გიორგი შარვაშიძეს შეხვდნენ.
საინფორმაციო პორტალი მოიცავს მეცნიერთა რეესტრს, მათ „პროფილებს“ უნივერსიტეტების და ინსტიტუტების სიებს, პროექტებს, გრანტებს, სამეცნიერო შრომების ელექტრონულ რეპოზიტარიუმს (არქივს) და სხვა.
საქართველოს სამეცნიერო ბიბლიოთეკის სერვერზე ეს სისტემა უკვე დაინსტალირებულია და ნიმუშისათვის დაწყებულია ქართველი მეცნიერების მონაცემების შეყვანა.
სისტემაში ქართველ მეცნიერთა შესახებ სრულყოფილი ინფორმაცია იქნება თავმოყრილი, რაც ხელს შეუწყობს მათი ხილვადობის გაზრდას უცხოელი პარტნიორებისათვის. იტალიელი სპეციალისტების მასპინძლობის მიზანია დაზუსტდეს მათთან აღნიშნული სისტემის განვითარებისა და მართვის ზოგიერთი დეტალი. ასევე შეთანხმებულ იქნას ამ პროგრამის საქართველოში სრულფასოვნად ასამოქმედებლად თანამშრომლობის დეტალები. 2016 წელს იგეგმება, რომ სისტემას ანტიპლაგიატის დეტექტირების პროგრამაც გადაებას. Cineca იტალიური კონსორციუმია.
მას ხელმძღვანელობს დირექტორთა საბჭო, რომელიც შედგება წევრი უნივერსიტეტების რექტორებისა ან მათი მოადგილეების, ეროვნული კვლევითი საბჭო (CNR ) და განათლების, უნივერსიტეტებისა და კვლევების სამინისტროს (MIUR) წარმომადგენლებისაგან. Cineca-ს ფუნქციაა კვლევითი საქმიანობისა და სამეცნიერო საზოგადოების მხარდაჭერა სუპერ-კომპიუტერებისა და კომპიუტერული პროგრამების მეშვეობით.
დღეს Cineca მაღალი ტექნოლოგიების ხიდია იტალიის აკადემიურ საზოგადოებას, მკვლევართა, მსოფლიოს სამრეწველო და საჯარო ორგანიზაციებს შორის.
