სოციალურ ქსელში კვლავ გააქტიურდა პოლემიკა ,,საქართველოს ახალგაზრდული მთავრობის“ შესახებ. თემას აქტუალობა ტელეკომპანია ,,რუსთავი 2-ის“ გენერალურმა დირექტორმა – ნიკა გვარამიამ შესძინა, რომელმაც ,,საქართველოს ახალგაზრდული მთავრობის“ შესახებ გაკეთებული სიუჟეტი გამოაქვეყნა და თან შემდეგი შინაარსის ტექსტი დაურთო:
,,იმედია, ვერც ერთი, ვერასდროს, პოლიტიკაში ვერ მოხვდება. P.S რა ჯანეტი, რის ნოდიკო. აი, ესაა ნამდვილი უბედურება.”
ნიკა გვარამიას პოსტს არაერთი ადამიანი გამოეხმაურა, მათი დიდი ნაწილი ტელეკომპანია ,,რუსთავი 2-ის“ გენერალურ დირექტორს ეთანხმება:
,,საქართველო იდიოტების სამჭედლოდ იქცა თუ რა ხდება?“, ,,ვაზელინი კასრებით აქვს მომარეგებული პრემიერის არ ვიცი, მაგრამ ოფიციანტი 100%“, ,,ვინ გვტროლავს ასე დაუნდობლად?!“ – ეს და სხვა მრავალი შეფასება მოჰყვა გამოქვეყნებულ სიუჟეტს.
ამას ,,საქართველოს ახალგაზრდული მთავრობის“ უკვე ყოფილმა პრემიერ-მინისტრმა, რატი რატიანმა შემდეგი განცხადებით უპასუხა:
,,მოგესალმებით, ბატონო ნიკოლოზ. თქვენგან განსხვავებით, შედარებით კორექტული ვიქნები. თქვენ ხომ არ მიცნობთ, მე სრულიად აპარტიული ვარ! თქვენთვის, ვინც ნაციონალების ცუმბუშა არ არის, ყველა მიუღებელია. გამოდით ვიწრო პარტიული ჩარჩოებიდან და შეხედეთ საქართველოს საღი თვალით. საქართველო მხოლოდ ნაცებით არ შედგება! ამდენმა ბოღმამ არ დაგახრჩოთ, თავს გაუფრთხილდით! არ მეგონა ნიკა გვარამიას უბედურების განზომილება თუ შეეშლებოდა! რაც შეეხება პოლიტიკაში მოხვედრას ეს საკითხი საქართველოს ბრძენ მოსახლეობას მივანდოთ!“
საინტერესოა, რას წარმოადგენს ,,საქართველოს ახალგაზრდული მთავრობა“ და ნამდვილად აქვს თუ არა კავშირი მას ,,ქართულ ოცნებასთან?“
ამის გასარკვევად ,,თბილისი თაიმსი“ რატი რატიანს დაუკავშირდა. მისი თქმით, იგი უკვე აგვისტოდან მოყოლებული, ,,საქართველოს ახალგაზრდულ მთავრობაში“ აღარაა.
,,დავაფუძნე არასამთავრობო ორგანიზაცია ,,ახალგაზრდული კონგრესი“ და ამ არასამთავრობოს ფარგლებში ვახორციელებ პროექტს ,,თბილისის ახალგაზრდული მერია“ – აღნიშნავს რატი.
როგორც თავად ამბობს, ნიკა გვარამიას ბრალდებები აბსურდულია და მას და მის არცერთ ორგანიზაციას არანაირი კავშირი არ ჰქონია ,,ქართულ ოცნებასთან“.
,,ახალგაზრდული მთავრობა იყო აპარტიული და არცერთ პარტიასთან არ ვთანამშრომლობდით. ახლა, როგორც ,,ახალგაზრდული კონგრესის“ დამფუძნებელი, აპარტიულად მუშაობას ვაგრძელებ.“ – აცხადებს რატი.
რაც შეეხება ,,საქართველოს ახალგაზრდული მთავრობის“ კონცეფციას – მოდელირება ორგანიზაცია ,,საქართველოს ახალგაზრდა პოლიტიკოსთა“ ბაზაზე 2014 წელს შეიქმნა. პროექტი არის საქართველოს მთავრობის ანალოგი, რომელიც 20-მდე ახალგაზრდა მინისტრისა და მათი მოადგილეებისგან შედგება. მათი უმეტესობის ასაკი 18-დან 25 წლამდე მერყეობს.
,,საქართველოს ახალგაზრდული მთავრობის“ ასპარეზზე გამოჩენას საზოგადოების მხრიდან ორმხრივი რეაქიცა მოჰყვა. ნაწილი ფიქრობს, რომ ეს ახალგაზრდების სამოქალაქო ჩართულობის შესანიშნავი ფორმაა და მათ წარმატებებ უსურვებს, ნაწილი კი – მათ საქმიანობას სკეპტიკურად ხვდება და აღნიშნულ ფაქტს პოლიტიკური სარჩული უძებნის.
თავად ,,საქართველოს ახალგაზრდულ მთავრობაში“ კი აცხადებდნენ, რომ მათი მთავარი სურვილი მედიატორის როლის შესრულებაა საზოგადოებასა და რეალურ მთავრობას შორის. გარდა ამისა, სურთ, რომ ამ პროექტის საშუალებით, ახალგაზრდების მეტი ჩართულობა გამოიწვიონ და ქვეყნისთვის მნიშვნელოვანი პროექტები განახორციელონ.
პროექტის ფარგლებში ახალგაზრდები სხვადასხვა უწყების წარმომადგენლებს ხვდებიან. მათ შორის, სპორტისა და ახალგაზრდობის მინისტრს, დევნილთა და განსახლების მინისტრს, თბილისის მერს და ა.შ. ისინი მათ საკუთარ შეხედულებებს აცნობენ და სხვადასხვა იდეას სთავაზობენ.
ასევე, ჩატარდა რამდენიმე საქველმოქმედო ღონისძიება, მათ შორის, ნიკუშა ნატროშვილის დასახმარებელად გრანდიოზული კონცერტი გაიმართა, შემოსული თანხა კი მთლიანად მის სამკურნალოდ გადაირიცხა.
მსოფლიოს მრავალ ქვეყანაში არსებობს მთავრობის, მერიის, საკრებულოსა და სხვადასხვა სახელმწიფო უწყების მოდელირება. ეს მრავალ განვითარებულ ქვეყანაში აპრობირებული მეთოდია – ახალგაზრდები მოდელირებების საშუალებით პრაქტიკულად ეუფლებიან სხვადასხვა უნარ-ჩვევას, რაც მათ გამოცდილებას სძენს და მომავალ საქმიანობაში ხელს მნიშვნელოვნად უწყობს.
ნატალია ჯალაღონია