მსოფლიოს საუკეთესო მასწავლებელი მეინის შტატის ერთ-ერთ სოფელში ცხოვრობს და ტესტირებებისა და გამოცდების ნიშნებს არაფრად დაგიდევთ. ნენსი ეტველმა სწავლებისა და ცოდნის ცენტრი 25 წლის წინ გახსნა და ყველაფერი იღონა, რომ საკლასო ოთახი მოსწავლეებისთვის ცოდნისა და ბედნიერების კერად ექცია. გასულ თვეს მისი ნახევარსაუკუნოვანი პროფესიონალიზმი და შრომა მსოფლიომ იმით დააფასა, რომ ნენსის წლის საუკეთესო მასწავლებლის ჯილდო მიანიჭა. ამ ჯილდოს განათლების სისტემაში ნობელის პრემიასთან აიგივებენ.
ეტველის სკოლა მეინის შტატში, ეჯკომბის ერთ-ერთ სოფელში მდებარეობს. ეს ჩვეულებრივი სკოლა არ არის და არც თავად ნენსია ჩვეულებრივი მასწავლებელი. მის სკოლაში ყველა საკლასო ოთახს დამოუკიდებელი ბიბლიოთეკა აქვს. აქ სტანდარტული ტესტირებები აკრძალულია. კლასში 7-8 მოსწავლეა. სკოლა იმითაცაა გამორჩეული, რომ აქ ყველა რელიგიურ და კულტურულ დღესასწაულს აღნიშნავენ. მოსწავლეები იმ წიგნების შესახებ წერენ, რომლებიც თავად აირჩიეს და წაიკითხეს. ყოველწლიურად ისინი დაახლოებით 50 წიგნს კითხულობენ, რაც არცთუ ურიგო შედეგია.
საუკეთესო მასწავლებლის დაჯილდოება წელს დუბაიში გაიმართა. მიღებული ფულადი ჯილდო, რომელიც 1 მილიონ ამერიკულ დოლარს შეადგენს, ნენსი ეტველმა თავის ცენტრს შესწირა. მან აღნიშნა, რომ სკოლას ახალი ჭერი და ღუმლები სჭირდება. ასევე წიგნები, რომელთა რაოდენობა არასოდესაა საკმარისი.
ნენსის სასკოლო კარიერა 25 წელზე მეტს ითვლის. ის მასწავლებლებისთვის განკუთვნილი ცხრა წიგნის ავტორია, რომელთაგან ერთი, „In the Middle”, ნახევარი მილიონი ეგზემპლარი გაიყიდა. ნენსი ბედნიერია, რომ მისი სკოლა მოსწავლეებისთვის ცოდნასა და სიხარულთან ასოცირდება და არა სტრესსა და იმედგაცრუებასთან.
ნენსის სამასწავლებლო კარიერა მოულოდნელად დაიწყო. თურმე ამ პროფესიაზე არასოდეს უფიქრია. უნივერსიტეტის დასრულების შემდეგ ვერ გადაწყვიტა, რა ექნა ინგლისური ლიტერატურის სპეციალისტის დიპლომისთვის და გეგმა B-ს მიჰყვა – კერძო რეპეტიტორი გახდა:
– პირველივე გაკვეთილის შემდეგ მივხვდი, რომ ეს საქმე მიყვარდა. მოსწავლეებთან თავს ისე ვგრძნობდი, როგორც შინ. ვგიჟდებოდი ლიტერატურაზე, მოსწავლეებისა და ლიტერატურის ნაზავი კი ჩემს სამყაროს განუმეორებელს ხდიდა.
1973 წელს ნენსი ეტველმა მასწავლებლად დაიწყო მუშაობა ნიუ–იორკში. მეშვიდე და მერვეკლასელებს ასწავლიდა. ამბობს, რომ ეს ასაკი დღესაც მისი ფავორიტია:
– როცა მეშვიდე და მერვე კლასის მოსწავლეებს რამეს აჩვევ, ეს მათ მთელი ცხოვრება მიჰყვება. ამ ასაკში მოზარდები სხვა თვალით იწყებენ სამყაროს ყურებას და ინტერესით აკვირდებიან „დიდების” ცხოვრებას.
მუშაობის პირველ წლებში ნენსიმ გააცნობიერა, რომ მოსწავლეები მოტივირებულნი არ იყვნენ იმ დავალებებისთვის, რომელთა შესრულებას სასწავლო გეგმა ითხოვდა. მასწავლებელმა ალტერნატიული მეთოდების ძიება დაიწყო და შეჩერდა პროფესორ დონალდ გრეივის ნაშრომზე „წერის გამოცდა”. ეს გახლავთ წყარო, რომლის მეშვეობითაც ნენსიმ თავისი კარიერა სწორად წარმართა. „წერის გამოცდა” მთლიანად მოსწავლის სურვილებსა და თვითგამოხატვაზეა ორიენტირებული. ნენსის გაკვეთილზე მოსწავლეებმა სურვილისამებრ დაიწყეს საკითხავი ლიტერატურის არჩევა. მისი წაკითხვის შემდეგ თემებსაც თავად ირჩევდნენ და საკუთარი ნააზრევი ფურცელზე გადაჰქონდათ. ამან ნენსის მოსწავლეები გაააქტიურა და მოტივაცია შესძინა. მასწავლებელმა მალე შეამჩნია, რომ მოზარდები სასწავლო პროცესში სიამოვნებით მონაწილეობდნენ.
საჯარო სკოლაში სწავლების დროს ნენსის უფლება არ ჰქოდა, თავისი სტრატეგია გამოეყენებინა და სკოლის შინაგანაწესისთვის გადაეხვია:
– კარი ჩავკეტე და მოსწავლეებთან საუბარი დავიწყე. მაშინვე მივხვდი, რომ ყველა მოზარდმა იცის, რა არის მისთვის საინტერესო და მიშვნელოვანი; საკმარისია, ოდნავ ვუბიძგოთ.
1990 წელს ნენსი ნიუ–იორკს ტოვებს და საცხოვრებლად მეინის შტატში გადადის, სადაც საკუთარ სკოლას აარსებს. სწავლებისა და ცოდნის ცენტრი ყოველწლიურად 80 მოსწავლეს იღებს და მერვე კლასამდე ზემოხსენებული პროგრამით ასწავლის. გარდა ამისა, სკოლის მთავარი პრინციპი ერთმანეთის კულტურული და რელიგიური გრძნობების პატივისცემაა:
– ჩვენ ყოველწლიურად აღვნიშნავთ ჩინურ ახალ წელს, მიცვალებულების დღეს, რამადანსა და ყველა სხვა რელიგიურ დღესასწაულს. მინდა, ყველა მოსწავლეს ფართო ცოდნა ჰქონდეს ერთმანეთის კულტურისა და რელიგიის შესახებ, ასევე – თანაგრძნობა და პატივისცემა ერთმანეთის მიმართ.
ამერიკის სხვადასხვა შტატში მცხოვრები მასწავლებლები ყოველწლიურად ჩადიან ნენსის სკოლაში, აკვირდებიან სასწავლო პროცესს, იღებენ ახალ გამოცდილებას და უკან ბრუნდებიან. ნენსის იმედი აქვს, რომ მასთან ნანახს სტუმრად მოსული მასწავლებლები თავიანთ საკლასო ოთახში წაიღებენ და მოსწავლეებს ახალ მეთოდებს გააცნობენ.
მერვე კლასის დასრულების შემდეგ ნენსის მოსწავლეები კოლეჯსა თუ სხვა სკოლაში გადასასვლელად საჭირო გამოცდებში 97%-იან შეფასებას იღებენ. ეტველი გამუდმებით კითხულობს მათ ამბებს და ბრაზობს, რომ მის მოსწავლეებს მაინც უწევთ გამოცდების ჩაბარება და ნიშნებისთვის ბრძოლა.
– ვფიქრობ, ყველაზე მნიშვნელოვანი რამ, რაც მე და ჩემს მოსწავლეებს გვაერთიანებს, ისაა, რომ ჩვენ არასოდეს ვსაუბრობთ ნიშნებზე, – ამბობს ნენსი დუბაიში გამართულ დაჯილდოებაზე და თავის სოფელს უბრუნდება.
წყარო: www.mastsavlebeli.ge
ნატალია ჯალაღონია
