ცენტრალური საარჩევნო კომისიის ცნობით, საქართველოში ამომრჩეველთა საერთო რაოდენობა 3 537 249-ს შეადგენს 27 ოქტომბრის საპრეზიდენტო არჩევნების წინ.
ეს მონაცემი 76 602-ით ნაკლებია ამომრჩეველთა საერთო რაოდენობის იმ მონაცემზე, რომელიც 2012 წლის ოქტომბრის საპარლამენტო არჩევნებზე დაფიქსირდა და 3 613 851-ს შეადგენდა.
2010 წლის მაისის ადგილობრივი არჩევნებზე სულ 3 544 770 ამომრჩეველი იყო რეგისტრირებული, 2008 წლის მაისის საპარლამენტო არჩევნებზე – 3 472 876, ხოლო იმავე წლის იანვარში საპრეზიდენტო არჩევნებზე ამომრჩეველთა საერთო რაოდენობა 3 372 836-ს შეადგენდა.
ცესკოს მიერ 6 ივლისს გამოქვეყნებული მონაცემები ასევე შეიცავს ამომრჩეველთა რაოდენობას 73 საარჩევნო ოლქიდან თითოეულში, საიდან ყველაზე დიდი ოლქი კვლავაც ქუთაისია 158 502 ამომრჩევლით, ხოლო ყველაზე პატარა ყაზბეგი, სადაც 5 776 ამომრჩეველია რეგისტრირებული. თუმცა ორივე ამ ოლქში იმაზე ნაკლები ამომრჩეველია რეგისტრირებული, ვიდრე შარშანდელ საპარლამენტო არჩევნებზე, როცა ქუთაისში ამომრჩეველთა რაოდენობა 162 732-ს, ხოლო ყაზბეგში 5 810 ამომრჩეველს შეადგენდა.
კანონმდებლობის მიხედვით, ცესკო საარჩევნო პერიოდში ამოწმებს ამომრჩეველთა სიებს და ცვლილებები შეაქვს მასში. ბოლო მონაცემს ამომრჩეველთა საერთო რაოდენობის შესახებ საარჩევნო ადმინისტრაცია არჩევნებამდე 5 დღით ადრე გამოაქვეყნებს.
11,07.13
