თბილისის და ბათუმის საერთაშორისო აეროპორტების ოპერატორ კომპანია, ტავ ჯორჯიასა და ებრაულ ავიაკომპანია “El Al Israel Airlines”-ის შვილობილ კომპანია „Sun d’Or Airlines ”-ს შორის რამოდენიმე თვიანი მოლაპარაკებები წარმატებით დასრულდა.
როგორც “თბილისი თაიმსს”ტავ ჯორჯიიას პრესსამსახურიდა აცნობეს, ავიაკომპანიის წარმომადგენლები საქართველოს ორ დღიანი ვიზიტით ესტუმრნენ, რომლის ფარგლებშიც ისინი, ტავ ჯორჯიას შუამდგომლობით, საქართველოს ეკონომიკისა და მდგრადი განვითარების მინისტრის მოადგილეს, დავით ხუციშვილს და ასევე სამოქალაქო ავიაციის სააგენტოსა და საქართველოს ტურიზმის ეროვნული ადმინისტრაციის ხელმძღვანელებს შეხვდნენ.
“Sun d’Or Airlines” ქართულ ავიაბაზარზე 2016 წლის ივნისის თვიდან შემოდის. ებრაული ავიაკომპანია ფრენებს თელ-ავივიდან თბილისის საერთაშორისო აეროპორტში კვირაში ერთხელ- სამშაბათობით, ხოლო ბათუმის მიმართულებით კვირაში ორჯერ- ორშაბათსა და პარასკევს, Boeing 737-800 ტიპის ავიახომალდით შეასრულებს.
“El Al Israel Airlines”-ის შვილობილი კომპანია „Sun d’Or Airlines ” 1977 წლიდან ფუნქციონირებს. დღეისათვის „Sun d’Or Airlines“ ჩარტერულ რეისებს მსოფლიოს 40 მიმართულებით ახორციელებს. მათ შორის ევროპის, აფრიკისა და ხმელთაშუაზღვის აუზის ქვეყნებში. ხოლო რაც შეეხება ისრაელის ნაციონალურ ავიახაზებს, „El Al Israel Airlines” 1948 წელს დაფუძნდა და მისი სათაო ოფისი თელ-ავივში მდებარეობს. ავიაკომპანია ადგილობრივ და საერთაშორისო ფრენებს 52 მიმართულებით ასრულებს. ამჟამად “El Al Israel Airlines”- ის ავიაპარკი 41 საჰაერო ხომალდისაგან შედგება.
