„შარშან ნასვამობის გამო მართვის მოწმობა 30 ათას მძღოლს ჩამოვართვით. აქედან მხოლოდ 10–მა პროცენტმა დაიბრუნა 700–ლარიანი ჯარიმის ხარჯზე. ქულები ჩამოაკლდება მას, ვინც მანქანას მართავდა და არა მანქანის მფლობელს“. საგზაო მოძრაობის უსაფრთხოებასთან დაკავშირებით კანონის გამკაცრებაზე და კონკრეტულ რეგულაციებზე, შინაგან საქმეთა მინისტრის მოადგილემ, შალვა ხუციშვილმა ტელეკომპანია „იმედზე“, გადაცემა „ქრონიკის“ ეთერში ისაუბრა.
„კანონპროექტის შედგენის მომენტში არასამთავრობოებთან გვქონდა კონსულტაციები და მათი შენიშვნები გავითვალისწინეთ. კანონი გამკაცრებულია, ნასვამობის შემთხვევაში მაშინვე ხდება მართვის მოწმობის ჩამირთმევა. დღევანდელი კანონით ნასვამ მძღოლს მეორე დღესვე შეუძლია მიმართოს საპატრულო პოლიციის დეპარტამენტს და თუ დიდი დარღვევები არ აქვს, 700–ლარიანი ჯარიმით დაიბრუნოს მართვის მოწმობა. ახალი ცვლილებით კი, მეორე დღესვე მიმართვა არ შეიძლება და მხოლოდ 3 თვის შემდეგ, 1000–ლარიანი ჯარიმით შეიძლება დაიბრუნოს მართვის მოწმობა. ამ ეტაპზე ეს ზომიერი გამკაცრებაა და შემდეგ ადმინისტრირების ხარჯზე კიდვ უფრო გამკაცრდება.
ავტოავარიების ხშირი მიზეზი არის ნასვამობა, სიჩქარის გადაჭარბება და არასწორი მანევრი. რეალურად მხოლოდ ამაზე ფოკუსირება არ იქნება სწორი, ისედაც გარკვეული ნაბიჯები გამკაცრების მიმართულებით იდგმება. პარლამენტის იურიდიული კომიტეტის წევრებმა მოგვმართეს, რომ ქულების ჩამოკლების სისტემა ამ დარღვევას არ შეხებოდა. გავითვალისწინეთ ისიც, რომ პარკირებასთან დაკავშირებით არის ადგილის პრობლემა და არ იქნებოდა რაციონალური, რომ მოქალაქეებისთვის პასუხისმგებლობა დაგვეკისრებინა, როცა სახელმწიფო მათ არ სთავაზობს შესაძლებლობას. პარკირებასთან დაკავშირებით ჯარიმები გაიზრდება და ამ მიმართულებით გამკაცრდება სახელმწიფოს დამოკიდებულება“ , – განაცხადა შალვა ხუციშვილმა.
მანანა ღოღობერიძე
