მინისტრთა კაბინეტმა ამჯერად საგარეო საქმეთა მინისტრსა და ევროპულ და ევროატლანტიკურ სტრუქტურებში სახელმწიფო მინისტრებს მოუსმინეს.
როგორც “თბილისი თაიმსს” მთავრობის ადმინისტრაციიდან აცნობეს, სამუშაო შეხვედრაზე განსახილველი საკითხები იყო ევროკავშირთან სავიზო რეჟიმის ლიბერალიზაცია, აბრეშუმის გზის პროექტის განვითარება, ევროატლანტიკური ინტეგრაცია, სუვერენიტეტსა და ტერიტორიულ მთლიანობასთან დაკავშირებული საკითხები და აშშ-სთან სტრატეგიული პარტნიორობის გაძლიერება.
“საგარეო უწყებისა და ევროპულ და ევროატლანტიკურ სტრუქტურებში სახელმწიფო მინისტრის აპარატის პრიორიტეტებზე მინისტრთა კაბინეტის სამუშაო შეხვედრაზე იმსჯელეს, რომელიც მთავრობის ადმინისტრაციაში გაიმართა. პრეზენტაციები, უწყებების ძირითადი მიმართულებების შესახებ, მიხეილ ჯანელიძემ და დავით ბაქრაძემ გამართეს.
საქართველოს პრემიერ-მინისტრმა პრიორიტეტულად დაასახელა ასევე საზღვარგარეთ საქართველოს დიპლომატიური წარმომადგენლობების საქმიანობის ეკონომიკური კომპონენტის გაძლიერება, რაც პარტნიორ ქვეყნებთან, პოლიტიკურთან ერთად, ეკონომიკური ურთიერთობების გაღრმავებას შეუწყობს ხელს.
ევროპულ და ევროატლანტიკურ სტრუქტურებში სახელმწიფო მინისტრის აპარატი 2016 წელს ოთხი ძირითადი მიმართულებით იმუშავებს – ევროკავშირთან ასოცირების დღის წესრიგით გათვალისწინებული რეფორმები; ევროკავშირის მიერ საქართველოსთვის გაწეული დახმარების კოორდინაცია; ქვეყნის ევროატლანტიკური ინტეგრაცია; მოსახლეობასთან სტრატეგიული კომუნიკაცია, რათა მოსახლეობა ინფორმირებული იყოს იმ დახმარების პროგრამების შესახებ, რომელსაც საქართველო, სხვადასხვა მიმართულებით, ევროკავშირისგან იღებს”, – აცხადებენ მთავრობის ადმინისტრაციაში.
გიორგი კვირიკაშვილმა მსგავსი ფორმატის შეხვედრა რამდენიმე მიმართულებით უკვე გამართა. მინისტრთა კაბინეტი ყველა უწყების პროექტების პორტფელზე ერთობლივად, სამუშაო რეჟიმში იმსჯელებს, რის შემდეგაც აქტუალური საკითხების პრიორიტეტიზაცია მოხდება.
