გუშინ, ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე პარლამენტის წევრი სოსო ჯაჭვლიანი რელიგიური გრძნობების, არსებული რელიგიების და სასულიერო პირების შეურაცხყოფისთვის, ასევე რელიგიური შენობების და სიწმინდეების წაბილწვისთვის ადმინისტრაციული სასჯელის შემოღების ინიციატივით გამოვიდა, რომელსაც კომიტეტმა პირველი მოსმენით მხარი დაუჭირა.
სოსო ჯაჭვლიანის მიიჩნევს, რომ სახელმწიფო ვალდებულია დაიცვას მოქალაქეთა რელიგიური გრძნობები, რათა თავიდან იქნეს აცილებული რელიგიურ ნიადაგზე წარმოშობილი დაპირისპირებები. მისივე განცხადებით, მსგავსი სახის დანაშაულები ევროპის წამყვან ქვეყნებში მკაცრად ისჯება და აღნიშნულ ქმედებებს სისხლის სამართლის კოდექსი არეგულირებს. მან კომიტეტის წევრებს ევროპული ქვეყნების გამოცდილებაც გააცნო და იქ არსებული კანონმდებლობის მაგალითები წარუდგინა.
პარლამენტის წევრის მიერ მომზადებული პროექტით, ადმინისტრაციულ სამართალდარღვევათა კოდექსს 166-ე პრიმა მუხლი ემატება, რომლის მიხედვითაც:
- რელიგიური სიწმინდეების, რელიგიური ორგანიზაციის, ღვთისმსახურის და მორწმუნის მიმართ სიძულვილის საჯაროდ გამოხატვა ან/და ისეთი მასალის გამოყენება ან ჩვენება, რაც მიზნად ისახავს მორწმუნეთა გრძნობების შეურაცხყოფას – გამოიწვევს დაჯარიმებას 300 ლარის ოდენობით. განმეორებითი ქმედება კი 600 ლარით დასჯას ითვალისწინებს.
- რელიგიური შენობების და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება ან დაზიანება – გამოიწვევს 500 ლარის ოდენობით დაჯარიმება, განმეორებითი ქმედება კი 1000 ლარიანი ჯარიმით დაისჯება.
საკითხთან დაკავშირებით კომიტეტის სხდომაზე ღია დისკუსია წარიმართა. კომიტეტის წევრთა გარკვეული ნაწილი ჯარიმების გაზრდის ინიციატივითაც გამოვიდა, თუმცა პროექტის ავტორმა მათი მოსაზრებები არ გაიზიარა. კომიტეტის თავმჯდომარის, ეკა ბესელიას შეფასებით, საკითხი მეტად მნიშვნელოვანი, ფაქიზი და საყურადღებოა, შესაბამისად აუცილებელია დაცული იქნას ბალანსი გამოხატვის თავისუფლებასა და რელიგიურ გრძნობებს შორის, აქვე ასევე გასათვალისწინებელია ევროპული სასამართლოების პრაქტიკა და გამოტანილი გადაწყვეტილებები. თემის ირგვლივ გახსნილი დისკუსია კომიტეტის თავმჯდომარემ შეაჯამა და საკითხის ინიციატორს შემდეგი ფორმულირება შესთავაზა:
- პირის რელიგიური გრძნობების შეურაცხყოფა,
- რელიგიური სიწმინდეების და საკულტო ნაგებობების წაბილწვა.
რაც შეეხება ადმინისტრაციული დაჯარიმების ოდენობებს, კომიტეტის გადაწყვეტილებით სანქციები უცვლელად დარჩა.
პროექტის ავტორი “დემოგრაფიული განვითარების ფონდის” დირექტორი ზვიად ტომარაძეა.
განმარტებითი ბარათის თანახმად, “რამდენიმე წელია, სიტყვისა და გამოხატვის თავისუფლების საბაბით პერიოდულად ხდება ფარული თუ პირდაპირი შეურაცხყოფა როგორც საქართველოს მართლმადიდებლური ეკლესიის, ასევე, ქვეყანაში არსებული სხვადასხვა ტრადიციული რელიგიის მიმართ. გაურკვეველი ჯგუფები და პიროვნებები მიზანმიმართულად ახორციელებენ რელიგიური სიწმინდეების, ნაგებობების და სიმბოლოების შეურაცხყოფას. სოციალურ ქსელში შექმნილია რამდენიმე ათეული გვერდი, რომელთა პირდაპირი დანიშნულებაა ღვთის გმობა, მართლმადიდებლური ეკლესიის, მისი წინამძღოლისა და იერარქების შეურაცხყოფა. 2012 წლის 9 სექტემბერს გაურკვეველმა პირებმა ქაშუეთის ეკლესიის გალავანზე დახატეს წმინდა ნინოს კარიკატურა წარწერით: Pussy Riot”.
სოფიკო ნინიკაშვილი
