რელიგიის სააგენტოში თვლიან, რომ მას შემდეგ რაც საქართველოს სამოქალაქო კოდექსის 2011 წლის ცვლილებით (საქართველოს კანონი N5034-რს (05/07/2011) ), მოხდა რელიგიური გაერთიანებების გათანაბრება სამართლებრივი ფორმის მხრივ და მიეცათ შესაძლებლობა დარეგისტრირდნენ საჯარო სამართლის იურიდიულ პირებად, საჭიროა გადაიხედოს საქართველოს საგადასახადო კოდექსი (საქართველოს კანონი N3591 (17/09/2010)), რომელიც რელიგიური დენომინაციებისთვის საგადასახადო ურთიერთობების ნაწილში ადგენს განსხვავებულ რეგულაციებს.
კერძოდ, მოგების გადასახადისგან და დღგ–ისგან ათავისუფლებს საქართველოს საპატრიარქოს. აღნიშნული საგადასახადო კოდექსი მიღებულია 2010 წელს, როცა მხოლოდ „საქართველოს სამოციქულო ავტოკეფალურ მართლმადიდებელ ეკლესიას“ ჰქონდა საჯარო სამართლის იურიდიული პირის სამართლებრივი ფორმა.
„თანასწორობის პრინციპებიდან გამომდინარე, რელიგიური საქმიანობის საერთო, არაკომერციული ხასიათის გათვალისწინებით, სამართლებრივ სახელმწიფოში თანაბარი სამართლებრივი ფორმების მქონე კანონის შესაბამისად დარეგისტრირებული რელიგიური გაერთიანებები უნდა სარგებლობდნენ თანაბარი საგადასახადო პირობებით,“ – ნათქვამია რელიგიის სააგენტოს 2015 წლის ანგარიშში.
აღნიშნული ინიციატივა უკვე განხილულ იქნა ინტერრელიგიური სათათბიროს ფარგლებში და მიღებული იქნა გადაწყვეტილება სათანადო საკანონმდებლო ცვლილებების გზით მოხდეს რელიგიური გაერთიანებების გათანაბრება საგადასახადო კუთხით. სოფიკო ნინიკაშვილი
