თბილისის სახელმწიფო უნივერსიტეტში კანცლერის არჩევნებთან დაკავშირებით სტუდენტების მიერ საპროტესტო აქცია გაიმართა. სტუდენტთა ნაწილისთვის მიუღებელი აღმოჩნდა უნივერსიტეტის კანცლერობის ერთადერთი კანდიდატი გიორგი გაფრინდაშვილი.
კანცლერი უნივერსიტეტში უზრუნველყოფს ფინანსური, ადმინისტრაციული და მატერიალური რესურსების დაცვას.
კანცლერს როგორც წესი ირჩევს უნივერსიტეტის უმაღლესი წარმომადგენლობითი ორგანო-სენატი, რომელიც 42 წევრისგან შედგება (უნივერსიტეტის ყველა ფაკულტეტის წარმომადგენლები, როგორც პროფესორები, ისე სტუდენტები). ვინაიდან, კანცლერი ხმათა უმრავლესობით დაინიშნება, შესაბამისად, გიორგი გაფრინდაშვილს ამ თანამდებობაზე დასამტკიცებლად 22 ხმა სჭირდება. ფარული კენჭისყრის შედეგები დღესვე უნდა გამოცხადებულიყო, მაგრამ ცოტა ხნის წინ ცნობილი გახდა, რომ კანცლერის არჩევნები სტუდენტთა მოთხოვნის თანახმად დროებით გადაიდო.
როგორც ცნობილია, სენატის 12 წევრი თვითმმართველობიდანაა და ისინი ღიად უცხადებენ გიორგი გაფრინდაშვილს მხარდაჭერას. დარჩენილი 30 ხმიდან 10 ხმა საკმარისია, რომ გაფრინდაშვილი კანცლერად დაინიშნოს. სტუდენტებს მიაჩნიათ, რომ უნივერსიტეტის კანცლერად მის დანიშვნას თვითმმართველობის პრივილეგიების გაზრდა მოჰყვება თან, ვინაიდან სწორედ ის იყო თვითმმართველობის პირველი და მეორე მოწვევის წევრი და ერთ-ერთი ფაკულტეტის თავმჯდომარე. მისი კანდიდატურაც ამ ორგანოსთან ასოცირდება.
მთავარი მიზეზი, რის გამოც სტუდენტთა ნაწილი გიორგი გაფრინდაშვილის კანცლერად არჩევას აპროტესტებს, მათი თქმით, არის ის, რომ გიორგი გაფრინდაშვილი შემჩნეულია მოძალადე სტუდენტების მფარველობაში.
2011 წელს თვითმმართველობის ზოგიერთი წევრი დადანაშაულებულ იქნა კრიტიკულად განწყობილი სტუდენტების მიმართ ფიზიკურ ძალადობაში. ამ პერიოდში კანცლერობის კანდიდატად დასახელებული გიორგი გაფრინდაშვილი მუშაობდა უნივერსიტეტის ადმინისტრაციაში. აღნიშნული ფატები ხელმისაწვდომია და შეგიძლიათ იხილოთ სტუდია „მონიტორის“ მიერ ჩატარებული ჟურნალისტური გამოძიება.
ნანუკა მაღლაკელიძე
Discussion about this post