საქართველოს საპატრიარქო ოფიციალურ განცხადებას აქვეყნებს, რომლითაც ქვეყანაში ბოლო დროს განვითარებულ მოვლენებს ეხმიანება. გმობს ყოველგვარი პირადი ცხოვრების ამსახველი კადრების გადაღებისა და გასაჯაროების ფაქტს და ასეთ ქმედებას გამიზნულ ბოროტებასა და დანაშაულს უწოდებს.
„ვგმობთ ყოველგვარი პირადი ცხოვრების ამსახველი კადრების გადაღებისა და გასაჯაროების ფაქტს და მივიჩნევთ, რომ ასეთი ქმედება არის გამიზნული ბოროტება და დანაშაული, როგორც ამა თუ იმ პიროვნების, ისე ქვეყნის წინააღმდეგ,“ – საქართველოს საპატრიარქო.
განცხადებაში ასევე აღნიშნულია, რომ ქრისტიანული სამყარო მხოლოდ კანონიერ მეუღლეებს შორის სიყვარულისა და ქორწინების საფუძვლებზე დამყარებულ ურთიერთობებს აკურთხებს და მიუღებლად თვლის ნებისმიერი სახის სხვა თანაცხოვრებას.
„ქრისტიანული სამყარო, ისევე როგორც ყველა ტრადიციული რელიგია, რა თქმა უნდა, დაიცავს და აკურთხებს მხოლოდ კანონიერ მეუღლეებს შორის სიყვარულისა და ქორწინების საფუძვლებზე დამყარებულ ურთიერთობებს და ყოვლად მიუღებლად თვლის ნებისმიერი სახის სხვა თანაცხოვრებას; რაც შეეხება მონანულ ადამიანს, მას ეკლესია იწყნარებს და სიყვარულით უღებდა და კვალავაც გაუღებს კარს,“ – ნათქვამია საპატრიარქოს მიერ გამოქვეყნებულ ოფიციალურ განცხადებაში.
სოფიკო ნინიკაშვილი
Discussion about this post