კრწანისში “თავისუფალი დემოკრატების” თბილისის ორგანიზაციის რაიონული ოფისი გაიხსნა. კრწანისის ქუჩა #14-ში ოფისის გახსნას დაესწრნენ “თავისუფალი დემოკრატების” ლიდერები ირაკლი ალასანია, შალვა შავგულიძე, თამარ ამაშუკელი, გიორგი ცაგარეიშვილი და ზურაბ აბაშიძე. ოფიციალურ გახსნაზე ირაკლი ალასანიამ დამსწრე საზოგადოებას “თავისუფალი დემოკრატების” ახალი წევრი, ამირან გიგუაშვილი წარუდგინა და მას “თავისუფალი დემოკრატების” მანდატი გადასცა.
“დღეს მინდა კიდევ ერთი პროფესიონალი წარმოგიდგინოთ, რომელიც “თავისუფალ დემოკრატებს” შემოგვემატა, ჩვენს გუნდში. მიუხედავად ყველა თავდასხმისა, მიზანმიმართული შეტევისა, რომელიც ბოლო დროს ჩვენს წინააღმდეგ ხორციელდება, “თავისუფალი დემოკრატების” გუნდი იზრდება და სულ უფრო ძლიერდება. ამირანის რეზუმე შთამბეჭდავია, მისი ყველა ღირსების ჩამოთვლას დიდი დრო დაჭირდება, ამიტომ აქ შევჩერდეთ. რაც ყველაზე მთავარია, ამირან გიგუაშვილი აქტიურად მუშაობს ადამიანის უფლებათა დაცვის სფეროში, ადამიანი კი ჩვენთვის, “თავისუფალი დემოკრატებისთვის” უმნიშვნელოვანესი და უმთავრესი ღირებულებაა”, – აღნიშნა ირაკლი ალასანიამ.
საკუთარ ხედვებზე ისაუბრა “თავისუფალი დემოკრატების” ახალმა წევრმა.
“მე უბრალოდ, სხვა არჩევანის გაკეთების უფლება არ მქონდა. ჩემი შვილებისთვის, ჩემი ოჯახისათვის, ჩემი მეგობრებისთვის, ჩემი ქვეყნის უკეთესი მომავლისათვის. მე, ახლა უკვე როგორც “თავისუფალი დემოკრატი”, შევეცდები ჩემს თანაგუნდელებთან ერთად, საზოგადოებას წარვუდგინო მართლმსაჯულების სისტემის ერთხელ და სამუდამოდ გაჯანსაღების ჩვენეული ხედვა, რაც უპირველესად ძალოვანი უწყებების, პროკურატურის და სასამართლოს არა მოჩვენებით, არამედ რეალურ დეპოლიტიზაციას გულისხმობს”, – აღნიშნა ამირან გიგუაშვილმა.
