20 ქართველი ფერმერი რძის წარმოების თანამედროვე ტექნოლოგიებს უკრაინის ფერმებში გაეცნო. გაეროს სურსათისა და სოფლის მეურნეობის ორგანიზაციისა (FAO) და ევროპის რეკონსტრუქციისა და განვითარების ბანკის (EBRD) დაფინანსებით, ქართული რძის მწარმოებელი ფერმერები და სპეციალისტები 10 დღის განმავლობაში ეცნობოდნენ და სწავლობდნენ რძის წარმოების სექტორს უკრაინული ფერმების მაგალითზე.
სემინარი ორი მოდულისგან შედგებოდა: „ცხოველთა ჯანმრთელობა“ და „ცხოველთა კვება“. ქართველმა ფერმერებმა ინფორმაცია მიიღეს თემებზე: საკვები ტექნოლოგიები, სხვადასხვა ჯიშის ცხოველთა კვება, რეპროდუქციის ოპტიმიზაცია, ახალგაზრდა საქონლის მოვლა, ცხოველთა უსაფრთხოების გაზრდა.
სასწავლო ტურის ფარგლებში, ქართველმა ფერმერებმა რძის საუკეთესო უკრაინული ფერმების ექსპერტთა გამოცდილება გაიზიარეს და უკრაინის რძის მწარმოებელთა ასოციაციის (AMP) კონსულტანტებისგან საჭირო რჩევები მიიღეს. მონაწილეებმა ასევე დაათვალიერეს რძის ფერმები უკრაინის სხვადასხვა რეგიონში: ვინიცაში, ოდესაში, ხერსონში, დნეპროპეტროვსკში, პოლტავასა და ჟიტომირში. ყველა ფერმა, რომელიც სასწავლო ტურის მონაწილეებმა მოინახულეს, მრავალფეროვანია საქონლის რაოდენობის, მოვლის პირობების, რძის წარმოების ტექნოლოგიების, ორგანიზაციული სტრუქტურისა და ინვესტირების თვალსაზრისით.
მონაწილეებმა ცალსახად დადებითი შეფასება მისცეს სასწავლო ვიზიტს და კმაყოფილება გამოთქვეს იმ ინფომაციის მიღების გამო, რომელიც სფეროს სპეციალისტებმა მათ გაუზიარეს.
რძის მწარმოებელი შპს. გეო ფარმის მფლობელი თამაზ ბანეთიშვილი ამბობს, რომ სემინარის პირველივე დღეს უკრაინელი ექსპერტები დაეხმარნენ რომ მისი ძროხების საკვები რაციონის კორექტირება მოეხდინა. შედეგად, საქართველოში დაბრუნებულმა მეწარმემ დღეში 150 ლიტრით გაზარდა საკუთარი 30 ძროხის წველადობა. „უახლოეს მომავალში ჩემი ფერმის გაფართოებას ვგეგმავ და უკრაინულ ფერმებში მიღებული ცოდნა ძალინ დამეხმარება რომ ჩემი მომავალი ფერმის კონცეფცია სწორად დავგეგმო“, – განაცხადა ბანეთიშვილმა.
აღსანიშნავია, რომ სასწავლო ვიზიტის მონაწილეთა გარდა, რძის ექსპერტების მიერ მოწოდებული ინფორმაცია ნებისმიერი სხვა ფერმერისთვისაც ხელმისაწვდომია. რძის წარმოების შესახებ საჭირო ინფორმაციისა და ექსტერტებისგან სასურველი რჩევების მიღება ნებისმიერ მსურველს შეუძლია ვებგვერდზე: http://georgiandairy.org/ka.
სემინარის მეორე ნაწილი 2016 წლის აგვისტოშია დაგეგმილი და ის ფერმების მენეჯმენტს, წარმოების ეკონომიკას, ცხოველთა შენახვასა და გამრავლებას შეეხება.
