ლიტვაში ვიზიტის ფარგლებში საქართველოს საგარეო საქმეთა მინისტრმა დელეგაციის წევრებთან ერთად საქართველოს პირველი რესპუბლიკის (1918-1921წწ.) ოფიცრის, დათიკო მაჭავარიანის საფლავი მონახულა. ცნობილი ქართველი სამხედრო და საზოგადო მოღვაწე, დათიკო მაჭავარიანი რუსეთის მიერ საქართველოს ოკუპაციის შემდეგ ემიგრაციაში წავიდა და ქ. ვილნიუსში დასახლდა, სადაც სამხედრო სამსახური პოლონეთის შეიარაღებულ ძალებში დაიწყო და მაიორის სამხედრო წოდება მიენიჭა. დათიკო მაჭავარიანის საფლავი ვილნიუსში ანტაკალნისის სასაფლაოზე მდებარეობს.
ოფიციალური ვიზიტის დასაწყისში საქართველოს საგარეო საქმეთა მინისტრმა პატივი მიაგო ლიტვის თავისუფლებისა და დამოუკიდებლობისათვის დაღუპულ მებრძოლთა მემორიალს.
ანტაკალნისის სასაფლაოზე განთავსებული მემორიალი ვილნიუსში 1991 წლის 13 იანვარს საბჭოთა ჯარების მიერ მოკლული მშვიდობიანი მოსახლეობის ხსოვნას ეძღვნება და ასევე, სიმბოლურად განასახიერებს საბჭოთა რეჟიმის წინააღმდეგ მებრძოლი პარტიზანებისა და ოკუპაციის პერიოდში დაღუპული მოსახლეობის ხსოვნას.
