რამდენიმე დღის წინ სოციალურ ქსელში მომხმარებელმა რატი თორდიამ ფოტოპოსტი გამოაქვეყნა შემდეგი შინაარსის ტექსტის თანხლებით:
,,აი, რითი აპირკეთებს “m²” თავიანთი ნაშენები შენობების გარეფასადებს – ბეტონზე ქაფითაა მიმაგრებული პენოპლასტისფილები. ამიტომაც ჩამოიშალა დღეს გამთენიისას ვაჟას მე-2 კვარტალში. კიდევ კარგი, მზიდი კედლები ჟელატინისგან არაა დამზადებული, თუმცა რა ვიცით.”
ტექსტს თან რამდენიმე ფოტო ახლდა, რომელზეც შენობის ფასადების ჩამოშლილი ნაწილი ჩანდა.
,,თბილისი თაიმსი” სამშენებლო კომოანია ,,m²ნუცუბიძეს” დაუკავშირდა და კომენტარი სთხოვა:
,,გავრცელებული ინფორმაცია იმის შესახებ, თითქოს „m² ნუცუბიძეზე“ ჩამოიშალა ფასადი, სიმართლეს არ შეესაბამება.
სამუშაოები ფასადზე რამდენიმე დღის წინ დაიგეგმა, რის შესახებაც მაშინვე ეცნობათ „m² ნუცუბიძის“ მაცხოვრებლებს. ასევე, შეგიძლიათ იხილოთ ხარაჩოს ფოტო, გადაღებული 6 აპრილს, რომელზეც დათბუნების მცირე ნაწილის დემონტაჟი და სამუშაო პროცესია ასახული.
აპრილის დასაწყისში ძლიერი ქარის შედეგად დაზიანდა ფასადის 2 ფილა. კომპანია “m²-მა” დაავალა სამშენებლო სამუშაოების შემსრულებელ კომპანია „ანაგს“ ფასადის სრული რევიზია და გადაწყდა, რომ აღმოსავლეთის ფასადი დ ბლოკში მთლიანად გამოცვლილიყო. ამის შემდეგ მოხდა ფასადის დათბუნების დემონტაჟი და გავრცელებულ ფოტოებზე სწორედ დემონტაჟის შედეგია.
სამშენებლო კომპანია ,,ანაგი” თავად ფარავს დათბუნების დემონტაჟისა და ხელახალი მონტაჟის ღირებულებას. ფილები თავიდან მიეკვრება უფრო ძლიერი ადჰესიური მასალის გამოყენებით, რომელსაც მოჭიდების უკეთესი მახასიათებლები აქვს, გათვლილი უფრო მკაცრ კლიმატურ პირობებზე.
ნებისმიერი სხვა სახის გავრცელებული ინფორმაცია არ შეესაბამება სიმართლეს და ემსახურება კომპანიის მიზანმიმართულ დისკრედიტაციას,”- ასეთია კომპანიის პასუხი.
რაც შეეხება სამშენებლო კომპანია ,,ანაგის” კომენტარს:
,,სამშენებლო კომპანია ,,ანაგი” აცხადებს, რომ 6 აპრილიდან კომპლექსში „m²,,m²ნუცუბიძეზე“ აპრილის დასაწყისში, ძლიერი ქარების პერიოდში , შენობის ერთ-ერთ ფასადზე შემჩნეულ იქნა სარისკო უბანი, საიდანაც 2 ფილის აშრევებაც შეინიშნებოდა. თბოიზოლაციის ფენის გაუმჯობესების მიზნით ხორციელდება დათბუნების ფილის გეგმიურ დემონტაჟი ფასადის ერთ მხარეზე. აღნიშნული სამუშაოების განხორციელება საჭირო გახდა ძლიერი ქარის შემდგომ ფასადის სრული რევიზიის შედეგად. შესაბამისად, ყოველგვარი განცხადება იმის თაობაზე, რომ ფასადის ეს ნაწილი თავისით ჩამოიშალა, არ შეესაბამება სიმართლეს. დემონტაჟის სამუშაოებს თანმიმდევრულად ვახორციელებთ.
ორშაბათიდან ასევე გეგმიურად მოხდება დათბუნების მასალის მონტაჟი. ბოდიშს ვუხდით კომპლექსის მაცხოვრებლებს შექმნილი დისკომფორტისათვის.”
ნატალია ჯალაღონია
