ადგილობრივ ბაზარზე კომპანია „ქარელის ხილის“ პროდუქცია გამოჩნდა. კომპანია,რომელიც 2015 წელს დაარსდა სხვადასხვა ხილის ჩირს სთავაზობს მომხარებელს. „ქარელის ხილი“ გლეხებისგან იძენს პროდუქტს და შემდეგ მათ შეფუთული პროდუქციის სახით მაღაზიაში ანთავსებს. კომპანიის პირველადი საინვესტიციო კაპიტალის მოძიება სოფლის მეურნეობის სამინისტროს მიერ გამოცხადებული გადამამუშავებელი საწარმოების თანადაფინანსების პროექტის ფარგლებში მოხდა.
სიახლეს წარმოადგენს ის ფაქტი, რომ ძალიან მალე, კომპანიის მიერ წარმოებული ქლიავის ჩირი ევროკავშირის ბაზარზე გავა. შავი ქლიავის ჩირის წარმოება საწარმომ გასული წლის სექტემბრიდან დაიწყო. ჩირი 200 გრამიანი შეფუთვით იყიდება, სავარაუდო ქვეყნები კი,სადაც ამ პროდუქციას დააგემოვნებენ – გერმანია, ისრაელი და უკრაინაა.
კომპანიის შესახებ „თბილისი თაიმსს“ ვრცლად „ქარელის ხილის“ მარკეტინგისა და გაყიდვების მენეჯრი ვახტანგ სილაგაძე ესაუბრა.
როგორც ცნობილია, ქარელში დამზადებული ქლიავის ჩირი ევროკავშირის ბაზარზე გადის, ამ სიახლის შესახებ რომ გვიამბოთ ? როგორ დაიწყო მოლაპარაკებები, რა სირთულეები შეგხვდათ?
– ამ ეტაპზე „ქარელის აგრო ინდუსტრიული კომპანია“ ოპერირებს მხოლოდ ადგილობრივ ბაზარზე. მაგრამ ჩვენს მიზანს ადგილობრივი ბაზრის გარდა წარმოადგენს ექსპორტიც, რომელიც იგეგმება წარმოების მოცულობისა და ასორტიმენტის გაზრდასთან ერთად.
აღსანიშნავია, რომ კომპანია ამ ეტაპზე სერიოზულად მუშაობს საექსპორტო არხების იდენტიფიკაციასა და მათთან თანამშრომლობაზე. მოცემულ პერიოდში მიმდინარეობს მოლაპარაკებები რუსეთისა და უკრაინის წამყვან საცალოდ ვაჭრობის კომპანიებთან. ხოლო სტანდარტების (ISO 2200; HACCP; ISO 9001:2008 ) დანერგვისა და სერტიფიცირების შემდგომ იგეგმება ევროპოს ბაზრის პენეტრაციაც.
როგორ შეაფასებთ ადგილობრივ ბაზარს და პროდუქციის სტანდარტებს, რა უპირატესობები აქვს „ქარელის ჩირს“?
– პირველ რიგში, აღსანიშნავია, რომ ადგილობრივ ბაზარზე ძირითადად იმპორტირებულ პროდუქციას მოიხმარენ. აღნიშნული პროდუქცია ერთმანეთისგან განსხვავდება როგორც ხარისხით, ასევე კონსისტენციითა და ფასით. უზბეკური და ირანული პროდუქცია ძირითადად რეალიზდება ასაწონი ხაზით, როგორც საცალოდ მოვაჭრე კომპანიების მიერ, აგრეთვე რაიონულ მარკეტებსა და ბაზრების მეშვეობით. რაც შეეხება თურქულ პროდუქციას, ეს არის ძირითადად შეფუთული ჩირი, რომელიც მაღალი საფასო მარჟით რეალიზდება.
ადგილობრივი წარმოების ჩირის პროდუქცია, რომელიც ოპერირებს საქართველოს ბაზარზე შეიძლება ითქვას, რომ ბევრად მცირეა, ვიდრე შეიძლება რომ იყოს.
რაც შეეხება ქარელის ჩირის უპირატესობას, პირველ რიგში საყურადღებოა წარმოების მეთოდოლოგია და პროდუქტის ხარისხი. ქარელის ჩირის უპირატესობაა პროდუქტის სარეალიზაციო ფასი, რომელიც ბევრად მცირეა ვიდრე კონკურენტებისა.
ვფიქრობ, დღეს მომხმარებელი ბევრად უფრო დიდ ყურადღებას აქცევს პროდუქტის შემადგენლობასა და ხარისხს. ამ ჭრილში მნიშვნელოვანია, რომ მომხმარებელმა ყოველთვის მიაქციოს ყურადღება ჩირის შემადგენლობას. თუ მომხმარებლის მიზანია ნატურალური პროდუქტის შეძენა (თუნდაც სამკურნალოდ), შემადგენლობაში მითითებული უნდა იყოს მხოლოდ ხილი და არავითარი სხვა დანამატი, რაც ხშირ შემთხვევაში ესე არ არის იმპორტულ პროდუქციასთან დაკავშირებით.
გარდა ჩირისა, კიდევ რას აწარმოებს კომპანია და როგორია მისი სამომავლო გეგმები?
– უნდა აღინიშნოს, რომ კომპანიამ უკვე გააფართოვა პროდუქციის ასორტიმენტი, შავ ქლიავთან ერთად აწარმოებს მსხლისა და ვაშლის ჩირს, აგრეთვე იგეგმება სეზონური საჩირე ჯიშების გამოშრობა დაბალ ტემპერატურაზე შრობის ტექნოლოგიის გამოყენებით, ესენია: ნესვი, ატამი და სხვა. ამ ეტაპზე რეალიზაციაშია შავი ქლიავის ჩირი (კურკიანი და უკურკო) და შერეული (მსხალი, ვაშლი, უკურკო ქლიავი).
რაც შეეხება მომიჯნავე წარმოებებს, ვფიქრობთ რომ მოვახდინოთ ინტეგრაცია იმ პროდუქციისა, რომელზე სამომხმარებლო მოთხოვნა არსებობს. ამ ეტაპზე იკვეთება, რომ მომხმარებელი ითხოვს არაძვირადღირებულ ე.წ. „სასუსნავს“, რომელიც შესაძლოა იყოს როგორც ტყლაპი, აგრეთვე სხვა მსგავსი ტიპის ჯანმრთელი პროდუქტი. აქვე უნდა აღინიშნოს, რომ კომპანია აპირებს მომხმარებელს შესთავაზოს ჯანმრთელი, ეკოლოგიურად სუფთა პროდუქტი მათივე კრიტერიუმების შესაბამისად. ჩვენ ერთ-ერთ საწარმოო მიზანს წარმოადგენს ჩირის წარმოება შოკოლადის გარსით, რომელზე მოთხოვნაც რეალურად არსებობს ბაზარზე.
ნათია კეკენაძე
