„მე არ დამიმალია, რომ გიორგი კვირიკაშვილმა თავდაპირველად დადებითი შთაბეჭდილება დატოვა,“ – საპარლამენტო უმცირესობის ლიდერმა დავით ბაქრაძემ პრემიერ-მინისტრის საქმიანობის 100 დღე „რუსთავი-2“-ზე, გადაცემა „არჩევანის“ ეთერში შეაფასა.
„მე არ დამიმალია, რომ მე მომეწონა, იგი თავისი წინამორბედისგან განსხვავებით არის მშვიდი, დალაგებული ადამაინი. შესაძლებელია მასთან კომუნიკაცია და არ იყენებს ზიზღის ენას. თუმცა დღეს ვაფასებთ არა გიორგი კვირიკაშვილის პიროვნებას, არამედ პრემიერ-მინისტრს, რომელიც პასუხისმგებელია ქვეყანაში არსებულ ვითარებაზე.
ამ 4 წლის განმავლობაში არასოდეს გვქონია ასეთი დაბალი ეკონომიკური ზრდა, რაც არის გიორგი კვირიკაშვილის პრემიერობისას. ქართული ეკონომიკა ფაქტიურად დგას და აღარ ვითარდება. არასდროს საქართველოს საგარეო ვალი არ ყოფილა იმდენი, რამდენიც დაფიქსირდა 2016 წლის თებერვალში. საგარეო ვალმა ბატონი კვირიკაშვილის პრემიერობის დროს 15 მილიარდ დოლარს მიაღწია. 2016 წლის ექსპორტი არის ჩამოსული 2011 წლის დონეზე ქვემოთ. ქვეყნის ეკონომიკამ 5 წლით უკან დაიხია.
არაკომპეტენტურობა, უცოდინრობა, ერთიანი ხედვის არარსებობა, არათანმიმდევრულობა. „ქართულმა ოცნებამ“ 4 წლის განმავლობაში ამ თვისებებით გამოიჩინა თავი,” – აღნიშნა ბაქრაძემ.
მანანა ღოღობერიძე
