„არ უნდა ვიყოთ ჩასაფრებულები, “მაპზე” ჩაციკვლა არის პოლიტიკური კაპრიზი. როცა ხელისუფლებას ადანაშაულებენ, რომ ცუდად მუშაობს რადგან “მაპს” ვერ იღებს, ეს არის მანიპულაცია და პოლიტიკურ ქულებზე გათვლილი საქციელი,“ – ამის შესახებ პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა „tv-პირველზე“, გადაცემა „რვიანის“ ეთერში ისაუბრა.
მან ასევე განიხილა ვარშავის სამიტის სავარაუდო შედეგი და სავარაუდო კანდიდატურა სამიტზე წარსადგენად.
„საქართველო ვარშავის სამიტზე ითხოვს წევრობას. ჩვენ წინა სამიტებზე, მაგალითად ბუქარესტში ვსარგებლობდით მხოლოდ პოლიტიკური მესიჯებით. ამ მესიჯებს მოყვა უსაფუძვლო მოლოდინები. დიახ, ჩვენ გვაქვს განაცხადი ნატო-ს წევრობაზე და ამისთვის არსებობს ყველა საჭირო ინსტრუმენტი. ჩვენ გვაქვს ნატო-საქართველოს საწვრთნელი ცენტრი. რეფორმებით წინ ვართ ვიდრე სხვა ასპირანტი ქვეყნები. ამას არც ნატო მალავს თავის შეფასებებში. უნდა გვქონდეს რეალისტური მოლოდინები. ნატომ პირდაპირ თქვა, რომ საქართველო შედის 5 თავსებად ქვეყანაში და ამით ყველაფერი ითქვა.
კატეგორიული წინააღმდეგი ვარ ამ თემის სპეკულაციით. თავდაცვის სამინისტრო არის მგრძნობიარე უწყება. მუდმივი საუბრები იმაზე,რომ შეიძლება მინისტრი შეიცვალოს, ჯარისკაცისთვის, ოფიცრისთვის და სხვა სამხედრო პირისთვის როგორც მინიმუმ ადუნებს სისტემას.პრემიერ-მინისტრმა მკაფიოდ თქვა,რომ მინისტრები არიან თავის ადგილზე. დიახ, ვარშავის სამიტზე წავა თავდაცვის მინისტრი და მას ქვია თინა ხიდაშელი. ჩვენ ახლა ვართ მაქსიმუმის მიღწევის ეტაპზე და მან ამისთვის ძალიან ბევრი იშრომა,“ – განაცხადა სესიაშვილმა.
მანანა ღოღობერიძე
Discussion about this post