სრულიად საქართველოს მუსლიმთა სამმართველო ამ დღეებში მუჰამმედ შუამავალის მოვლინების დღეს აღნიშნავს. წელს მუჰამედ წინასწარმეტყველის დაბადებიდან 1445 წელი შესრულდა. ამ დღეს მუსლიმი მრევლი განსაკუთრებით აღნიშნავს. ბათუმის ხელოვნების ცენტრში ამ დღისადმი მიძღვნილ საზეიმო ღონისძიება გაიმართება. დაგეგმილია მუჰამმედ შუამავლისადმი ხოტბის შესხმა, მუსლიმთა წმინდა წიგნიდან – ყურანიდან აიათების (ამონარიდების) კითხვა, რელიგიური შინაარსის პოეზიის ნიმუშების წარდგენა. ღონისძიებაში მონაწილეობს საქართველოს მუსლიმი მრევლის წარმომადგენლები, საქართველოში მცხოვრები სხვადასხვა კონფესიების მოწვეული სტუმრები, საქართველოს ხელისუფლების სხვადასხვა პირები, დიპლომატიური კორპუსისა და მისიების წარმომადგენლები.
„მუჰამმედ შუამავალი დედამიწას 1445 წლის წინ, 571 წელს მოევლინა და ამ დღეს მუსლიმები ყოველწლიურად აღნიშნავენ და დღესასწაული მოძრავად ითვლება, რადგანაც მთვარის კალენდრით აღინიშნება. საქართველოში დღეისათვის სხვადასხვა სტატისტიკური მონაცემებით მუსლიმი მოსახლეობის რაოდენობა 11 პროცენტს აღემატება. აჭარის რეგიონში დღეისათვის არსებობს დაახლოებით 214 ჯამეა. რომელთაგან უძველესი აგებულია 1823 წელს. ბოლო 25 წლის განმავლობაში კი რეგიონში აიგო მხოლოდ 14 ჯამე. დანარჩენი კი მიუკუთვნება მე-19 საუკუნეს ან მეოცე საუკუნის დასაწყის და ხშირ შემთხვევაში წარმოადგენს ქართული ტრადიციული ხუროთმოძღვრების ნიმუშებს.“-სრულიად საქართველოს მუსლიმთა სამმართველო.
ისლამში მუჰამედი ცნობილია როგორც “წინასწარმეტყველი” და “მაცნე”. ყურანი მას ასევე მოიხსენებს როგორც “წინასწარმეტყველთა ბეჭედს”. ის იყო პიროვნება, რომელმაც მთლიანად შეცვალა არაბი ტომების ტრადიციული ცხოვრება, მისცა მათ ახალი რელიგია, ცხოვრების ახალი წესი და მიზანი.
მუჰამედი დაიბადა 570 წელს. წარმოშობით იყო წარჩინებული, მაგრამ გაღარიბებული ბანუჰაშიმის გვარიდან. ერთხანს მუჰამედი ვაჭრობას ეწეოდა და საქარავნო გზებზე იუდეველებსა და ქრისტიანებს ხვდებოდა, ეცნობოდა მათ სარწმუნოებას. მდიდარი მექელი ვაჭრის ქვრივზე ხადიჯეზე ხელსაყრელმა დაქორწინებამ მაჰმადს საშუალება მისცა მთელი დრო დაეთმო თავისი რელიგიურ-ეთიკური პრობლემებისათვის. გადმოცემის მიხედვით, დაახლოებით 609 (ან 610) რამადანის თვეში, ჰირის მთაზე (მექის ახლოს) მთავარანგელოზმა ჯიბრაილმა (გაბრიელმა) მაჰმადს უკარნახა წმინდა წიგნი „ყურანი“ და დაავალა ხალხისათვის მისი გაცნობა. თითოეული სიტყვა, ე.ი. გამოცხადება, მთავრდებოდა მოწოდებით: „მოჰყევ!“ ანუ: „სხვასაც უამბე, რაც მოისმინე!“. მუჰამადი ღვთის ნებას დაჰყვა და ერთი ღმერთის – ალაჰის – მოციქული გახდა. ის ახალი მოძღვრებით მკაცრად ილაშქრებდა წარმართული სარწმუნოების წინააღმდეგ.
თავდაპირველად არაბთა მცირე ჯგუფი აღიარებდა ახალ რელიგიას, შემდეგ კი მთელმა არაბეთმა, ბოლოს კი სხვა ხალხებმაც (ირანელებმა, თურქებმა, ეგვიპტელებმა, ინდოელებმა, სლავების ნაწილმა…) ირწმუნეს. მუჰამედი გახდა მისივე შექმნილი პირველი ისლამური თეოკრატიული სახელმწიფოს მეთაური.
ყურანი, რომელიც ისლამის ძირითადი წყაროა მთლიანად შედგება მუიჰამედის ქადაგებებისგან და “ჰადისები” ანუ გადმოცემები მუჰამედის გამონათქვამებისა და ქცევების შესახებ.
მუჰამედის აკლდამა არის მუსლიმანთა მეორე წმინდა ადგილი ქააბას შემდეგ.
სოფიკო ნინიკაშვილი
