მაისის დასაწყისში PALITRANEWS-ის ეთერში ახალი საზოგადოებრივ-პოლიტიკური თოქ-შოუ გავა. საავტორო გადაცემას სახელწოდებით ”360 გრადუსი” გიორგი მიქანაძე წაიყვანს. თოქ-შოუ მოიცავს დღის აქტუალურ თემებს, პოლიტიკურ, ეკონომიკურ, სოციალურ საკითხებს.
ერთსაათიანი თოქ-შოუ პირდაპირ ეთერში ორშაბათიდან ხუთშაბათის ჩათვლით, 21:00 საათზე გავა. ეთერში მოწვეული სტუმრები გადაცემის მთავარი თემის შესახებ ისაუბრებენ. პროექტი ჟურნალისტის ჩართვას, ასევე ახალი ამბების კოლაჟსაც ითვალისწინებს.
გადაცემის ავტორები მაყურებლებს ახალ მიდგომებს, შეულამაზებელ რეალობას, მიუკერძოებელ პოზიციებს და განსხვავებული რაკურსით დანახულ თემებს შესთავაზებენ.
”360 გრადუსი – ანუ ვცდილობთ, ყველა კუთხიდან, ყველა ჭრილიდან შევხედოთ მოვლენებს. შევეცდებით, ჩვენს გადაცემაში საზოგადოების მაქსიმალური ჩართულობა იყოს. მეც მაქსიმალურად მონდომებული ვიქნები, რომ ჩემი შესაძლებლობების და გამოცდილების ფარგლებში თემა ანალიტიკურად გაიშალოს. სხვათა შორის, ეს ფუფუნება ქართულ მედია სივრცეში მაინცდამაინც არ არის, რომ ანალიტიკური თოქ-შოუები იყოს. მართალია თოქ-შოუები არის, მაგრამ იქ ანალიტიკის ნაწილი ნაკლებადაა. უფრო ცხელ-ცხელ ამბებზე ვართ ორიენტირებული, ვეცდებით ცხელი ამბებიც გვქონდეს, თუმცა მთავარი თემა იქნება ანალიტიკა, სხვადასხვა აქტუალური თემების გაშლა და მიმდინარე მნიშვნელოვანი საკითხების წამოწევა და განხილვა 360 გრადუსით”, – აღნიშნა გადაცემის წამყვანმა გიორგი მიქანაძემ.
“თბილისი თაიმსის” მკითხველს შევახსენებთ, გიორგი მიქანაძე გახლდათ ეკონომიკური პოლიტიკის მკვლევარი, ასისტენტ-პროფესორი. ის გამოირჩევა სამოქალაქო აქტიურობით და სხვადასხვა საზოგადოებრივად აქტიურ თემებზე ხშირად ღიად და საჯაროდ გამოთქვამდა მოქალაქეობრივ პოზიციებს. მათ შორის, აქტიურად თანამშრომლობს ჩვენს რედაქციასთან. შესაბამისად, “თბილისი თაიმსის” შემოქმედებითი ჯგუფი წარმატებებს უსურვებს გიორგის.
წყარო: interpressnews.ge
© მაქსიმე ბაქრაძის ფოტო