„როცა ვიღაც ამბობს, რომ ნატო არ გვინდა, ეს არის მთელი ქვეყნის პრობლემა და არა მხოლოდ რესპუბლიკელების. საერთაშორისო ორგანიზაციები გვეუბნებიან,რა გინდათ ევროპაში თუ გიყვართ სტალინი?“ დავით უსუფაშვილის მიერ გაკეთებულ განცხადებაზე და „ნორჩ ლენინელებზე“ ისაუბრა “რესპუბლიკური პარტიის” ერთ-ერთმა ლიდერმა ლევან ბერძენიშვილმა „ტვ-პირველზე, გადაცემა „რვიანის“ ეთერში.
„ქართული ოცნების“ კოალიციის შიგნით გამოთქმული ყველა მოსაზრება,რომელიც ან არ გმობს სტალინიზმს, ან აქებს სტალინს და ამბობს, რომ „ნატო“-ში არ გვინდა, არ არის აღქმული როგორც ინდივიდუალური აზრი. ნატოში არის ტენდენცია, რომ თუ ბევრს არ მოითხოვ და ძალიან არ მოითხოვ, იფიქრებენ, რომ არ გინდა. მითუმეტეს როდესაც ჩვენი პარლამენტარები მსგავს განცხადებებს აკეთებენ. თურმე ყველა ღირსეულმა ქართველმა სტალინს პატივი უნდა სცეს, ეს ცუდი ტენდენციაა.
გიორგი კვირიკაშვილმა თქვა, რომ საქართველოში აკრძალულია სტალინის პროპაგანდა. მისი მშობლიური პარტია თუ მოუსმენს პრემიერ-მინისტრს, ცუდი არ იქნება. ევროპელი კოლეგები დარწმუნებულები უნდა იყვნენ, რომ არ ვიხედებით წარსულისკენ.
დავით უსუფაშვილი არა თუ „ქართული ოცნების“, „რესპუბლიკური პარტიის“ სიასაც არ ადგენს. ჩვენი საქმე არ არის „ქართული ოცნების“ სია, მაგრამ თუ იქნება უკეთესი, არავის ეწყინება. თუ ვერ ხედავენ პრობლემებს, დავეხმარებით. ჩვენ ვგულშემატკივრობთ ევროპაზე ორიენტირებული კადრების მოსვლას ყველა პარტიაში.
დიახ „რუსთავი-2“, რომელიც არის ტენდენციური, ჩვენი მონაპოვარია. გვინდა, რომ გვყავდეს განსხვავებული. ჯობს ტელე-არხი ექვემდებარებოდეს ოპოზიციას და არ იყოს საბჭოთა კავშირისეული გადაცემა „ვრემია“ “, – განაცხადა ლევან ბერძენიშვილმა.
მანანა ღოღობერიძე
