1-5 მაისს საქართველოს გერმანელ ჟურნალისტთა ჯგუფი სტუმრობს. როგორც თბილისი თაიმსს” საქართველოს საგარეო საქმეთა სამინისტროდან აცნობეს, სტუმრები საინფორმაციო ტურის ფარგლებში კახეთში, ბოდბის მონასტერს მოინახულებენ და შუხმანის ღვინის საწარმოს დაათვალიერებენ. გერმანელი ჟურნალისტები მოინახულებენ იუსტიციის სახლს, ნატო-საქართველოს ერთობლივი წვრთნისა და შეფასების ცენტრსა და 112-ის სერვის ცენტრს. ისინი სოფელ ასურეთს (უძველესი გერმანული დასახლება საქართველოში) ესტუმრებიან, სადაც სოფლის სარეაბილიტაციო სამუშაოების მიმდინარეობას ადგილზე გაეცნობიან.
ვიზიტის ფარგლებში გერმანელი ჟურნალისტები შეხვედრას გამართავენ საქართველოს აღმასრულებელი და საკანონმდებლო ხელისუფლების წარმომადგენლებთან, ასევე არასამთავრობო სექტორის წარმომადგენლებსა და ქართველ კოლეგებთან. გერმანელ სტუმრებს, ასევე, საქართველოს კათალიკოს-პატრიარქი ილია II მიიღებს.
გერმანელ ჟურნალისტთა საინფორმაციო ტური საქართველოში ბერლინის პრესკლუბის, გერმანიის ფედერაციულ რესპუბლიკაში საქართველოს საელჩოს, საქართველოს საგარეო საქმეთა სამინისტროს ორგანიზებითა და საქართველოში გერმანიის ფედერაციული რესპუბლიკის საელჩოს თანამონაწილეობით ხორციელდება. საინფორმაციო ტურის მიზანია გერმანელი ჟურნალისტები უკეთ გაეცნონ საქართველოში არსებულ ვითარებას, მთავრობის საქმიანობას, განხორციელებულ და დაგეგმილ რეფორმებს, საქართველოს ეკონომიკურ და საინვესტიციო გარემოს. ჯგუფში გაერთიანებული არიან ბერლინის პრესკლუბის წევრი ჟურნალისტები, რომლებიც გერმანიის ფედერაციული რესპუბლიკის წამყვან მედია საშუალებებს წარმოადგენენ.
