გიორგი ვაშაძემ ”ერთიანი ნაციონალური მოძრაობა” დატოვა. ის ახალ პოლიტიკურ მოძრაობას ქმნის. ამის თაობაზე საგანგებო განცხადება ვაშაძემ ცოტა ხნის წინ, პარლამენტში გააკეთა.
ვაშაძის თქმით, მან პარტია დატოვა, პოზიციებისა და ინტერესების შეუთავსებლობის გამო. ვაშაძემ აღნიშნა, რომ ის ვერ ხედავს პერსპექტივას, რომ პარტია ამომრჩეველს შესთავაზებს ისეთ სამომავლო გეგმებს, რომელიც ორიენტირებული იქნება ქვეყანაში არსებულ გამოწვევებზე.
“ნაცვლად სიცოცხლისუნარიანი ღია ორგანიზმისა, ჩვენ მივიღეთ დახურული კაბინეტური მმართველობის სისტემა, რომელიც მისი ბუნებიდან გამომდინარე თავადაა მოკავშირე ივანიშვილის მავნებლური მმართველობის და ემსახურება მხოლოდ პარტიის ერთი მცირე ჯგუფის ინტერესებს. ამ კაბინეტურმ მართველობას აქვს თავისი სახელები და გვარები: გიგა ბოკერია, მიშა მაჭავარიანი, ხათუნა გოგორიშვილი, გოკა გაბაშვილი და მათ ფასადად ქცეული დავით ბაქრაძე.
მე უარს ვამბობ გარანტირებულ ადგილზე საარჩევნო სიაში იმ ფასადური განახლებით, რომელსაც აპირებენ ეს ადამიანები და ვიწყებ ახალი მოძრაობის შექმნას, რომლის მთავარი პრინციპი იქნება ახალი ადამიანები პოლიტიკაში.
ჩემთვის ეს მარტივი გადასაწყვეტი არ იყო ძალიან დიდი ხანია ვფიქრობ ამასთან დაკავშირებით და კიდევ ერთხელ ვამბობ, მე არ მჭირდება უბრალოდ პარლამენტის მანდატი და სკამი პარლამენტში. მე მინდა წარმატებული საქართველო და ამას აუცილებლად გავაკეთებ”, – განაცხადა ვაშაძემ,” – აცხადებს ვაშაძე.
