“ეს არის დემონსტრირება იმისა, რომ საქართველოში რელიგიური უფლებების კუთხით პრობლემები არ არსებობს,”- ასე შეაფასა მარნეულში ახალი მეჩეთის გახსნა, რელიგიის საკითხთა სახელმწიფო სააგენტოს თავმჯდომარემ.
სრულიად საქართველოს მუსლიმთა სამმართველომ, აიათოლა სეიდ ჯავად შაჰრისტანის ფინანსური დახმარებით, ქალაქ მარნეულში ახალი მეჩეთი გახსნა. ღონისძიებას მუსლიმ სასულიერო პირებთან ერთად ესწრებოდნენ რელიგიის საკითხთა სახელმწიფო სააგენტოს წარმომადგენლები, აზერბაიჯანის ელჩის მოადგილე დურსუნ ჰასანოვი და აიათოლა სეიდ ჯავად შაჰრისტანი 14 კაციანი დელეგაციით.
“საქართველო არის მრავალეთნიკური და მრავალკონფესიური ქვეყანა. მუსლიმებს ქვეყანაში 312-მდე მეჩეთი აქვთ და დღეს კიდევ ერთი დაემატა. ეს დასტურია, რომ მთავრობა იცავს მუსლიმი მოქალაქეების ინტერესებს,”- აღნიშნა ჟურნალისტებთან საუბრისას სრულიად საქართველოს შეიხმა რამინ იგიდოვმა.
სტუმრებმა მეჩეთში ერთობლივი ლოცვა შეასრულეს და შემდეგ მათ საპატივცემოდ სადილი გაიმართა. ღონისძიებაზე აღნიშნა, რომ ღმერთის სახლი მნიშვნელობა არ აქვს მეჩეთი იქნება თუ ეკლესია, ის ადამიანებს სულიერად წმინდავს, უფლის გზაზე აყენებს და სიკეთისაკენ უბიძგებს, ამიტომაც უნდა ვეცადოთ, რომ ყველგან ავაშენოთ ისინი.
“გარემონტებული და ფაქტიურად ახლად აშენებული მეჩეთი გაიხსნა დღეს. ეს არის დემონსტრირება იმისა, რომ საქართველოში რელიგიური უფლებების კუთხით პრობლემები არ არსებობს, თავისუფლება ხორციელდება ბრწყინვალედ,”– რელიგიის საკითხთა სახელმწიფო სააგენტოს თავმჯდომარე ზაზა ვაშაყმაძე.
შეგახსენებთ, რომ აიათოლა სეიდ ჯავად შაჰრისტანი არის აიათოლა სისტანის წარმომადგენელი და ისლამურ სამყაროში ცნობილი რელიგიური ლიდერი. მისი ფინანსური მხარდაჭერით, მარნეულში აგრეთვე აშენდა ახალი კლინიკა, რომელიც აღიჭურვა თანამედროვე ტექნიკით და ასევე, საფუძველი ჩაეყარა ბაგა-ბაღის მშენებლობას.
სოფიკო ნინიკაშვილი
