„გლეხმა ყველაფერი დაკარგა და ვენახი განადგურდა პირწმინდად“. არ მოხდა სეტყვასაწინააღმდეგო ტექნიკის გამოყენება. ეს ტექნიკა სახელმწიფო ბიუჯეტს დაახლოებით 14-დან 20 მილიონამდე დაუჯდა“. კახეთის სტიქიის პრობლემებზე, ევროპარლამენტში ვიზიტზე და თამაზ მეჭიაურთან შესაძლო თანამშრომლობაზე „პატრიოტთა ალიანსის“ ლიდერმა ირმა ინაშვილმა ტელეკომპანია „GDS”-ზე, გადაცემა „2030“-ის ეთერში ისაუბრა.
„არსებობს ამინდის პროგნოზის სამსახური, გარემოს დაცვის სპეციალური დეპარტამენტი. ისინი წინასწარ დებენ პროგნოზს და უნდა განესაზღვრათ მოსალოდნელი სტიქია. თანამდებობიდან მოხსნეს დამცავი ტექნიკის გამოყენებაზე პასუხისმგებელი ორგანოს, „დელტა“-ს უფროსი. თუმცა თავდაცვის მინისტრია თავად მოსახსნელი. „დელტამ“ დროულად ვერ მიიღო დაფინანსება და ამისთვის ვერ მოხდა ტექნიკის გამოყენება.
„საგარეჯოსა და კახეთის სხვა რაიონებში ზარალი ძალიან დიდია. ყველას არ ჰქონდა ვენახი დაზღვეული. ამ პროცესში არის კითხვის ნიშნები. პასუხისმგებელია თავდაცვის მინისტრი, სოფლის მეურნეობის მინისტრი, მხარის გუბერნატორი და ასევე ადგილობრივი გამგეობა, რომელიც ტყუის, რომ შეიქმნა კომისია და სწავლობენ დაზარალებულთა მდგომარეობას.კომისია შექმნილი არ არის. ბევრი ცარიელი სიტყვების მიღმა არის დაზარალებული გლეხი,რომელიც ერთი მხრივ საბანკო კრედიტებით არის დატვირთული და მეორე მხრივ, მძიმე შრომა წყალში ჩაეყარა. შხამ-ქიმიკატები არ არის საკმარისი. მათ ფინანსური კომპენსაცია სჭირდებათ.
ევროპარლამენტში შევხვდი თითქმის ყველა გავლენიანი ფრაქციის წარმომადგენელს. ვისაუბრეთ წინასაარჩევნო ვითარებაზე, რისკებზე, რაც შეიძლება მოყვეს ხელისუფლების მხრიდან ადმინისტრაციული რესურსების გამოყენებას. ეს გერმანული მოდელი არის აბსოლუტური ჰაერი, საჭიროა ძირეული ცვლილებები. ჩვენ „ცესკო“-ში წევრი არ გვყავს და შესაბამისად ყველა დაგვჩაგრავს. ევროპარლამენტში ასევე ვისაუბრეთ ჩვენს მიერ ჩატარებულ ალტერნატიულ კვლევაზე. შედეგი იქნება ის, რომ “NDI” და „IRI” თავს დაანებებს ქართული ამომრჩევლის შეურაცხყოფას.
ბატონი თამაზ მეჭიაურის სამართლიან ტონს ძალიან ვაფასებ, რაც აქამდე აკლდა საქართველოს პარლამენტს. ვუფასებ, რომ საუბრობს ღიად და სწორად. რატომ უნდა გამოვრიცხოთ, რომ რამე ტიპის საუბარი მიმდინარეობს ჩვენს შორის. ასევე გოგი თოფაძეს არასოდეს დავუვიწყებ საგარეჯოს არჩევნებთან დაკავშირებით ვაჟკაცურ განცხადებებს. „ქართულ ოცნებაში“ მე ბევრი მეგობარი მყავს. ისინი წუხდნენ ჩემი შიმშილობის დროს, თუმცა არც ერთი არ გამოჩენილა. მათ ანგარიში გაუწიეს თავდაცვის მინისტრს,“ – განაცხადა ირმა ინაშვილმა.
მანანა ღოღობერიძე
