აფხაზეთისა და სამხრეთ ოსეთის ქრისტიანი მოსახლეობის პრობლემებთან დაკავშირებით ცალკე დოკუმენტი შეიქმნება. ამის შესახებ რუსეთის გაქრისტიანების 1025 წლისთავთან დაკავშირებით კიევში მყოფმა უწმინდესმა და უნეტარესმა ილია მეორემ “მე-9 არხისთვის” მიცემულ ექსკლუზიურ ინტერვიუში განაცხადა.
საქართველოს პატრიარქმა რუსეთის პრეზიდენტსა და პატრიარქთან გამართულ პირისპირ შეხვედრების დეტალებზე ისაუბრა და იმედი გამოთქვა, რომ ვლადიმერ პიტინი დაპირებას შეასრულებს და აფხაზეთისა და ცხინვალის პრობლემები დოკუმენტში აისახება.
რუსეთის მხარის მიერ რამდენიმე დღის წინ შედგენილ მემორანდუმში, რომელშიც მსოფლიოს საეკლესიო გლობალური პრობლემები იყო შესული, არ იყო მოყვანილი სამხრეთ ოსეთისა და აფხაზეთის მართმადიდებელი ქრისტიანების პრობლემები.
„რუსეთის პრეზიდენტს უთქვამს პატრიარქისთვის, რატომ არ შეიტანეთ აფხაზეთიდან და ცხინვალიდან დევნილთა პრობლემები დოკუმენტშიო. როგორც პატრიარქი კირილი დამპირდა, ცალკე იქნება ეს საკითხი განხილული და განსაკუთრებული ყურადღება დაეთმობა. აქედან უნდა დავიწყოთ ლტოლვილების დაბრუნება ჩვენ საკუთარ კერაზე. რუსეთის პრეზიდენტი ალბათ შეასრულებს თავის დაპირებას“, – ბრძანებს საქართველოს პატრიარქი.
29.07.13
