2025 წლის მაისში საქართველოს 15-წლამდე ვაჟთა ნაკრებმა, ერევანში გამართული უეფას განვითარების თასის გათამაშება უზბეკეთთან გამარჯვებით და 3 ქულით დაასრულა – 0:3. ამ მოგებით, გიორგი ჩიტაურის გუნდმა ტურნირზე 6 ქულით პირველი ადგილი დაიკავა.
ჩვენმა ასაკობრივმა, პირველ ტურში, ტურნირის დებულების თანახმად, ძირითად დროში დაფიქსირებული ფრის შემდეგ პირდაპირ დანიშნულ პენალტების სერიაში ლატვიას მოუგო და 2 ქულა მოიპოვა; ხოლო მეორე ტურში, იდენტური სცენარის შემდეგ თერთმეტმეტრიანებში მასპინძელ სომხეთთან დამარცხდა და 1 ქულა მოიპოვა.
გიორგი ჩიტაურის ფორმაციის 15-წლამდე ნაკრებმა, ერევანში გამართული უეფა-ს განვითარების თასი 2022 წლის მაისშიც მოიგო.
8 მაისი | ლატვია 1:1 [2:4] საქართველო
10 მაისი | სომხეთი 2:2 [5:3] საქართველო
12 მაისი | უზბეკეთი 0:3 საქართველო
ბოლო შეხვედრაში, თავი გუნდის კაპიტანმა – ანდრია ფოცხვერიამ, დავით მაჭარაშვილმა და ნიკოლოზ დუნდუამ გამოიჩინეს. დუნდუამ, გოლების გატანა სომხეთთან (დუბლი) და ლატვიასთან მატჩებშიც შეძლო.
ერევნის განვითარების თასზე, ტურნირის საუკეთესო ფეხბურთელი – თორნიკე კვარაცხელია გახდა, ხოლო ტურნირის საუკეთესო ბომბარდირი, 4 გოლით – ნიკოლოზ დუნდუა.
ტურნირის თასი კი, ჩვენი ასაკობრივის კაპიტანს – ანდრია ფოცხვერიას, სომხეთის ნაკრების მთავარმა მწვრთნელმა – ჯონ ვან’ტ სხიპმა გადასცა.
