„როდესაც ახალი ადმინისტრაცია მოდის, რამდენიმე თვის განმავლობაში ხდება რეორგანიზაცია, არის ტრანზიციის პერიოდი და შემდეგ არის მცდელობა არსებობდეს ახალი ტიპის ინიციატივები. ჩვენ რაც შეიძლება მალე უნდა დავიწყოთ ურთიერთობები ახალი პრეზიდენტის ადმინისტრაციასთან, რომ მოვხვდეთ პრიორიტეტების სიაში, ან ძალიან მაღლა დღის წესრიგში“. ამის შესახებ „ერთიანი ნაციონალური მოძრაობის“ ერთ–ერთმა ლიდერმა, სერგი კაპანაძემ „რუსთავი 2“–ზე, გადაცემა „კურიერის“ ეთერში ისაუბრა.
„სამწუხაროდ ბოლო წლების განმავლობაში საქართველო ამ დღის წესრიგიდან გაქრა, თუ არ გაქრა ძალიან დაბლა ჩამოვიდა. თუმცა ეს არ ნიშნავს, რომ ამერიკის შეერთებული შტატები საქართველოს ტერიტორიულ მთლიანობას მხარს არ უჭერს. ჩვენი ოკუპაციის აქტიური საკითხები მუდმივად უნდა იყოს განხილული ამერიკის შეერთებული შტატების უმაღლესი ხელისუფლების პირებს და რუსეთის ხელისუფლების პირებს შორის. ამას სჭირდება ჩვენი დიპლომატიის და პირველ რიგში უმაღლესი ხელისუფლების პირების აქტიური მუშაობა.
ჩვენი მომავალი ურთიერთობები ბევრ რამეზე იქნება დამოკიდებული, მათ შორის იმაზე, როგორი ურთიერთობები იქნება ამერიკის შეერთებულ შტატებსა და რუსეთს შორის, რა პროცესები იქნება ევროპაში უსაფრთხოების კუთხით, და რამდენად აქტიური იქნება საქართველოს ხელისუფლება. იქნება თუ არა მმართველი გუნდი აქტიური, თუ გაიმეროებს იგივე შეცდომებს, რაც ოთხი წლის განმავლობაში გვქონდა.წინასაარჩევბოდ გაკეთებული განცხადებები ხშირად განსხვავდება იმ პოლიტიკისგან, რომელიც შემდეგ ხორციელდება. უნდა დაველოდოთ ვინ იქნება სახელმწიფო მდივანი, ის გუნდი, რომელიც წაიყვანს საგარეო პოლიტიკას და რუსეთთან ურთიერთობებს, წინასწარი განწყობები, შიში, ან აღფრთოვანება არ იქნება სწორი.
თავისუფალი ვაჭრობის შესახებ უნდა დაწყებულიყო მაღალი დონის დიალოგი, ორი შეხვედრა ჩატარდა 2012 წელს და შემდეგ არ გაგრძელებულა. ამ მხრივ პროგრესი 4 წელი არ გვქონია. რაც შეეხება თავდაცვისუნარიანობას, ამ თემაზეც დიალოგი ადრე დაიწყო და რაღაც ეტაპამდე მივიდა ამ ხელისუფლების დროს. ამის შენარჩუნება და გაღრმავება უნდა იყოს ფუნდამენტური საკითხი,“–განაცხადა სერგი კაპანაძემ.
მანანა ღოღობერიძე